പെഷര്വാര്: അഫ്ഗാന് അഭയാര്ത്ഥി ഷര്ബത് ഗുലയെ പാക്കിസ്ഥാന് മോചിപ്പിക്കുന്നു. വ്യാജ തിരിച്ചറിയല് രേഖകളുമായി അനധികൃതമായി താമസിച്ചു എന്ന കുറ്റത്തിന് പിടിയിലായ ഷര്ബത് ഇപ്പോള് പാക്ക് ജയിലിലാണ്.
മാനുഷിക പരിഗണനയിലാണ് ഷര്ബത്തിനെ വിട്ടയക്കുന്നതെന്ന് പാക്ക് ആഭ്യന്തരമന്ത്രി ചൗധരി നിസാര് അലി പറഞ്ഞു. ഇവരെ നാടുകടത്തുകയോ പാക്കിസ്ഥാന് വിട്ട് പോകാന് താല്കാലിക വിസ അനുവദിക്കുകയോ ആയിരിക്കുമെന്ന് ചൗധരി പറഞ്ഞു. നടപടികള് പൂര്ത്തിയാക്കിയതായും അദ്ദേഹം കൂട്ടിച്ചേര്ത്തു. ഷര്ബതിന് വ്യാജ തിരിച്ചറിയല് കാര്ഡ് നല്കിയ ഉദ്യോഗസ്ഥര്ക്കെതിരെ കേസെടുക്കുമെന്നും മന്ത്രി പറഞ്ഞു.
1985ല് നാഷനല് ജിയോഗ്രഫി മാസികയുടെ കവര് ചിത്രമായതോടെയാണ് ഷര്ബത് ഗുല ലോകശ്രദ്ധ നേടിയത്. കഴിഞ്ഞ ദിവസമാണ് പാക്കിസ്ഥാനിലെ ഫെഡറല് ഇന്വെസ്റ്റിഗേഷന് ഏജന്സി ഷര്ബത് ഗുലയെ അറസ്റ്റ് ചെയ്തത്.
ഷര്ബത്തിന് പാക്കിസ്ഥാന് പൗരത്വവും അഫ്ഗാന് പൗരത്വവും ഉണ്ടെന്ന് തെളിയിക്കുന്ന രേഖകള് ഇവരുടെ വീട്ടില് നിന്ന് കണ്ടെടുത്തതായി പോലീസ് വ്യക്തമാക്കി. ഷര്ബത് ബീബി എന്ന പേരില് തിരിച്ചറിയല് കാര്ഡ് ലഭിക്കുന്നതിന് ഇവര് വ്യാജരേഖകള് അടങ്ങുന്ന അപേക്ഷ നല്കിയിരുന്നതായി പാക് പോലീസ് കണ്ടെത്തിയിരുന്നു. ഇതേതുടര്ന്ന് ഏതാനും നാളുകളായി ഷര്ബത് പോലീസ് നിരീക്ഷണത്തിലായിരുന്നു.
