കണ്ണൂര്: ജില്ലയിലെ പുഴകള്, കുളങ്ങള്, തോടുകള് തുടങ്ങിയ ജലസ്രോതസ്സുകള് മാലിന്യമുക്തമാക്കുന്നതിന് അഴുക്കിനു പകരം അഴക് എന്ന പേരില് ജില്ലാ പഞ്ചായത്ത് പുതിയ പദ്ധതിക്ക് രൂപം നല്കി. ജില്ലാ ഭരണകൂടം, തദ്ദേശ സ്വയംഭരണ സ്ഥാപനങ്ങള്, സന്നദ്ധ സംഘടനകള് തുടങ്ങിയവയുടെ സഹകരണത്തോടെയാണ് പദ്ധതി നടപ്പാക്കുക. ഓരോ പ്രദേശത്തും മലിനമായിക്കിടക്കുന്ന ജല സ്രോതസ്സുകള് കണ്ടെത്തി ജനകീയ പങ്കാളിത്തത്തോടെ അവ വൃത്തിയാക്കുന്നതിനുള്ള പദ്ധതിയാണിത്. എന്.സി.സി- എന്.എസ്.എസ് വളണ്ടിയര്മാര്, വിദ്യാര്ഥികള്, തൊഴിലുറപ്പ് ജീവനക്കാര്, കുടുംബശ്രീ-സന്നദ്ധ പ്രവര്ത്തകര് തുടങ്ങിയവര് പദ്ധതിയില് പങ്കാളികളാവും. ഇതിനായി 10 ലക്ഷം രൂപ ജില്ലാ പഞ്ചായത്ത് നീക്കിവച്ചിട്ടുണ്ട്.
വേനല് വരുന്നതിനു മുമ്പേ എല്ലാ ജലസ്രോതസ്സുകളും ശുചീകരിക്കേണ്ടതുണ്ടെന്ന് ജില്ലാ പഞ്ചായത്ത് യോഗത്തില് പ്രസിഡന്റ് കെ.വി സുമേഷ് പറഞ്ഞു. ഇതിന്റെ മുന്നോടിയായി ജില്ലാ കലക്ടറുടെ നേതൃത്വത്തില് ബന്ധപ്പെട്ട കക്ഷികളുടെ വിപുലമായ യോഗം വിളിച്ചുചേര്ത്ത് കര്മ പദ്ധതികള് ആവിഷ്ക്കരിക്കും. വൃത്തിയാക്കിയ ശേഷം അവയില് വീണ്ടും മാലിന്യങ്ങള് കുന്നുകൂടുന്നത് തടയാന് മുന്കരുതല് നടപടികളും ബോധവല്ക്കരണ പ്രവര്ത്തനങ്ങളും കൈക്കൊള്ളുമെന്നും അദ്ദേഹം പറഞ്ഞു.
ജലസ്രോതസ്സുകളോടനുബന്ധിച്ച് അനുയോജ്യമായ ചെടികള് നട്ടുപിടിപ്പിക്കുന്നതിനുള്ള പ്രവര്ത്തനങ്ങളും പദ്ധതിയുടെ ഭാഗമായി നടത്തും. ഇതിനാവശ്യമായ ചെടികള് നല്കാന് സോഷ്യല് ഫോറസ്ട്രി വിഭാഗം സന്നദ്ധത അറിയിച്ചതായും അദ്ദേഹം പറഞ്ഞു.
ഇത്തവണ വരള്ച്ച രൂക്ഷമാവാനിടയുണ്ടെന്ന റിപ്പോര്ട്ടുകളുടെ അടിസ്ഥാനത്തില് അതിനു മുമ്പ് ലഭിക്കാനിടയുള്ള മഴവെള്ളം പരമാവധി സംരക്ഷിക്കുന്നതിന് മഴക്കുഴികള് ഉള്പ്പെടെയുള്ള പദ്ധതികള് ഗ്രാമതലത്തില് നടപ്പാക്കാനും ജില്ലാ പഞ്ചായത്ത് മുന്കൈയെടുക്കുമെന്നും അദ്ദേഹം പറഞ്ഞു.
