കണ്ണൂര്: രാജ്യത്തിന്റെ ഇതിഹാസതുല്യമായ നാവിക ചരിത്രത്തിന് വേണ്ടത്ര പരിഗണന ലഭിച്ചിട്ടില്ലെന്നും അതേക്കുറിച്ചുള്ള സമഗ്രമായ പഠന-ഗവേഷണങ്ങള് അനിവാര്യമാണെന്നും മുന് നാവികസേനാ മേധാവി അഡ്മിറല് അരുണ് പ്രകാശ് അഭിപ്രായപ്പെട്ടു. ഏഴിമല നാവിക അക്കാദമിയില് ആരംഭിച്ച ദില്ലി സെമിനാര് പരമ്പരയുടെ മൂന്നാമത് എഡിഷനില് മുഖ്യപ്രഭാഷണം നടത്തുകയായിരുന്നു അദ്ദേഹം. നമ്മുടെ നാവിക ചരിത്രത്തെക്കുറിച്ച് ഇന്ത്യാക്കാരേക്കാള് കൂടുതല് പഠനങ്ങളും രചനകളും നടത്തിയത് വിദേശ ചരിത്രകാരന്മാരാണ്. അവയാവട്ടെ വിദേശികളുടെ താല്പര്യത്തിനനുസരിച്ച് വളച്ചൊടിച്ചവയാണെന്നും അദ്ദേഹം പറഞ്ഞു.
ഇന്ത്യന് മഹാസമുദ്രത്തിലെ തീരസംസ്ഥാനങ്ങളിലെ പ്രാദേശിക പ്രശ്നങ്ങള്- വിദേശ നാവികാക്രമണങ്ങളുടെയും കോളനിവല്ക്കരണത്തിന്റെയും സ്വാധീനം എന്നതാണ് ഇത്തവണത്തെ സെമിനാര് പ്രമേയം. പശ്ചിമേഷ്യന് രാജ്യങ്ങളെ വീതിച്ചെടുക്കാന് ബ്രിട്ടനും ഫ്രാന്സും തമ്മില് 1916ലുണ്ടാക്കിയ സൈക്ക്-പിക്കോ കരാറാണ് സിറിയ, ഇറാഖ്, ലബനന്, ജോര്ദാന് തുടങ്ങിയ രാജ്യങ്ങളില് ഇപ്പോള് കണ്ടുവരുന്ന എല്ലാ കുഴപ്പങ്ങള്ക്കും വഴിമരുന്നിട്ടതെന്നും അദ്ദേഹം അഭിപ്രായപ്പെട്ടു.
വാണിജ്യപരവും രാഷ്ട്രീയവുമായ കാരണങ്ങളാല് വരുംനാളുകളില് ലോകത്തിന്റെ ശ്രദ്ധാകേന്ദ്രമായി ഇന്ത്യന് തീരപ്രദേശങ്ങള് മാറും. പോയകാലത്ത് രാജ്യം വിദേശകരങ്ങളിലമര്ന്നതിനു കാരണം നാവികസേനയുടെ കാര്യത്തില് നമുക്കുണ്ടായ വീഴ്ചയാണെന്നും അത് ആവര്ത്തിക്കപ്പെടുന്നില്ലെന്ന് ഉറപ്പുവരുത്താന് നമുക്ക് സാധിക്കണമെന്നും അദ്ദേഹം പറഞ്ഞു. ചരിത്രത്തെക്കുറിച്ചുള്ള ശരിയായ അവബോധം ഭാവിയില് ശരിയായ തീരുമാനമെടുക്കാന് നാവികസേനാ വിദ്യാര്ഥികളെ സഹായിക്കും. രാജ്യം മാത്രമല്ല, നമ്മുടെ അയല്രാജ്യങ്ങള് കൂടി നമ്മോടൊപ്പം വളരുമ്പോഴാണ് രാജ്യത്തിന്റെ സുസ്ഥിരത ഉറപ്പുവരുത്താനാവുകയെന്നും അദ്ദേഹം അഭിപ്രായപ്പെട്ടു.
ഒരു കാലത്ത് കോളോണിയലിസത്തിന്റെ ഇരകളായിരുന്ന ഇന്ത്യന് മഹാസമുദ്രത്തിലെ തീരപ്രദേശങ്ങളിലെ നിലവിലെ അവസ്ഥ വ്യക്തമാക്കുന്ന ചെറു ഡോക്യുമെന്ററിയോടെയാണ് സെമിനാര് പരിപാടികള് ആരംഭിച്ചത്. നേവല് അക്കാദമി ഒഫീഷ്യേറ്റിംഗ് കമാന്റന്റ് റിയര് അഡ്മിറല് എം.ഡി സുരേഷ് ആമുഖപ്രഭാഷണം നടത്തി.
വിവിധ വിഷയങ്ങളെക്കുറിച്ച് വൈസ് അഡ്മിറല് പ്രദീപ് ചൗഹാന് (റിട്ട), സാവിത്രിഭായ് ഫൂലെ പൂനെ യൂനിവേഴ്സിറ്റി ചരിത്രവിഭാഗം അസോ. പ്രഫസര് രാധിക ശേഷന്, സൗദി-യു.എ.ഇ മുന് ഇന്ത്യന് അംബാസഡര് ഡോ. തല്മീസ് അഹ്മദ്, കമോഡോര് ഒ ജോണ്സണ് തുടങ്ങിയവര് പ്രബന്ധങ്ങള് അവതരിപ്പിച്ചു. സെമിനാര് ഇന്നും തുടരും.
