തലശ്ശേരി: മുഖ്യമന്ത്രി പിണറായി വിജയന്റെ നാട്ടില് ബിജെപി പ്രവര്ത്തകരെ തെരഞ്ഞുപിടിച്ച് അക്രമിക്കുകയും വീടുകള് തകര്ക്കുകയുമാണെന്ന് ബിജെപി നേതാവും എംഎല്എയുമായ ഒ.രാജഗോപാല് പറഞ്ഞു.
പിണറായി വിജയന്റെ വീടിനടുത്ത് ഓലയമ്പലത്ത് ബസ്സ് കാത്തു നില്ക്കവേ സിപിഎം സംഘം വെട്ടിക്കൊലപ്പെടുത്തിയ രമിത്തിന്റെ മൃതദേഹം തലശ്ശേരി ജനറല് ആശുപത്രി മോര്ച്ചറിയില് സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നിഷ്ഠുരമായ ഈ കൊലപാതകം നടത്തിയവരെ മുന്വിധി കൂടാതെ എത്രയും പെട്ടെന്ന് കണ്ടെത്തണം. കണ്ണൂര് ജില്ലയിലെ അക്രമങ്ങള് അവസാനിപ്പിക്കാന് മുഖ്യമന്ത്രി തന്നെ മുന്കയ്യെടുത്ത് ചര്ച്ച നടത്തി ശാശ്വത പരിഹാരം കാണണം. അത് അദ്ദേഹത്തിന്റെ കടമയാണ്. ഇക്കാര്യം നേരത്തെയും മുഖ്യമന്ത്രിയോട് ആവശ്യപ്പെട്ടിരുന്നു.
സംസ്ഥാന മുഖ്യമന്ത്രിയുടെയും സിപിഎം സംസ്ഥാന സെക്രട്ടറിയുടെയും നാടാണ് പിണറായിയും കോടിയേരിയും. ഈ രണ്ട് പ്രദേശങ്ങളിലും നിരന്തരം ബിജെപി പ്രവര്ത്തകരെ തെരഞ്ഞുപിടിച്ചാണ് അക്രമിക്കുന്നത്. ഇത് കുറ്റകരമായ അനാസ്ഥയാണ്. അടുത്ത ദിവസങ്ങളിലായി പതിനഞ്ചിലേറെ വീടുകളാണ് അക്രമിക്കപ്പെട്ടത്. ഇത് കൊലപാതകത്തിന് മുന്നോടിയായി നടത്തിയതാണ്. മൂന്നു ദിവസത്തിനുള്ളില് രണ്ട് കൊലപാതകങ്ങളും മുഖ്യമന്ത്രിയുടെ മണ്ഡലത്തിലാണ് നടന്നിട്ടുള്ളത്. ഇക്കാര്യത്തില് മുഖ്യമന്ത്രി അടിയന്തരമായും ഇടപെടണമെന്നും യഥാര്ത്ഥ പ്രതികളെ കണ്ടെത്തി നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
വര്ഷങ്ങള്ക്ക് മുമ്പ് ബസ് ഡ്രൈവറായിരുന്ന ഉത്തമനെ ചാവശ്ശേരിയില് വെച്ച് ബസ്സില് നിന്ന് പിടിച്ചിറക്കിയാണ് വെട്ടിക്കൊലപ്പെടുത്തിയത്. ഇന്നലെ അദ്ദേഹത്തിന്റെ മകന് രമിത്തിനെയും കൊലപ്പെടുത്തി. ഇതിനൊക്കെ എന്ത് ന്യായീകരണമാണ് സിപിഎമ്മിന് മുന്നിലുള്ളതെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു.
