അമ്പലപ്പുഴ: അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിനു ഭീഷണിയായി പേപ്പര്വേസ്റ്റുകള്. നീക്കം ചെയ്യാന് തയ്യാറാകാതെ ദേവസ്വം ഉദ്യോഗസ്ഥര്. ക്ഷേത്രത്തിനു മുമ്പില് മുരിങ്ങമഠം മാളികയ്ക്കു വടക്കുഭാഗത്തെ കെട്ടിടത്തിലാണ് പേപ്പര്വേസ്റ്റുകള് കുമിഞ്ഞുകൂടിക്കിടക്കുന്നത്.
വര്ഷങ്ങള്ക്കുമുമ്പ് കെട്ടിടത്തില് പ്രവര്ത്തിച്ചിരുന്ന അസിസ്റ്റന്റ് കമ്മീഷണര് ഓഫീസ്, അക്കൗണ്ട്സ് ഓഫീസ് എന്നിവിടങ്ങളിലെ പഴയ രേഖകളാണ് വേസ്റ്റെന്ന് പറഞ്ഞ് ഇവിടെ കുന്നുകൂട്ടിയിട്ടിരിക്കുന്നത്. പേപ്പര് കിടക്കുന്ന ഭാഗത്ത് ക്ഷേത്രത്തിലെത്തുന്ന വാഹനങ്ങളുടെ ഡ്രൈവര്മാര് ഉള്പ്പെടെ തമ്പടിക്കുകയും പുകവലി ഉള്പ്പെടെ തമ്പടിക്കുകയും പുകവലിയുള്പ്പെടെ നടക്കുകയും ചെയ്യുന്നതായമ് ഭക്തര്ക്ക് ആശങ്കയുണ്ടാകാന് കാരണം. പുകവലിച്ചശേഷം എറിയുന്ന സിഗരറ്റ് കുറ്റികള് പേപ്പറിന് തീപിടിക്കാന് കാരണമാകുമെന്നും ഇത് നൂറ്റാണ്ടുകള് പഴക്കമുള്ള കെട്ടിടത്തിന് ഭീഷണിയാകുമെന്നും ഭക്തജനങ്ങള് ആരോപിക്കുന്നു.
എതാനും മാസം മുമ്പ് ഇത്തരത്തില് തീപിടുത്തം ഉണ്ടായതിനെത്തുടര്ന്ന് അഗ്നിശമനസേന എത്തി തീയണക്കുകയും പേപ്പര് കഷണങ്ങള് ചാക്കില് നിറച്ച് മാറ്റുകയും ചെയ്തിരുന്നു എന്നാല് വീണ്ടും പഴയതുപോലെ പേപ്പറുകള് കുന്നുകൂടി ഇഴജന്തുക്കളുടെ ഉള്പ്പെടെ വാസസ്ഥലമായി മാറി.
നിരവധി തവണ അമ്പലപ്പുഴ അസി. കമ്മീഷണറോട് ഭക്തര് വിവരം അറിയിച്ചിട്ടും നടപടിയെടുക്കാന് തയ്യാറായില്ല. ശബരിമല മണ്ഡലകാലം ആരംഭിക്കുന്നതിനു മുമ്പായി അനിഷ്ടസംഭവങ്ങള് ഉണ്ടാകാതിരിക്കാന് മുന്കരുതല് എന്ന നിലയില് പേപ്പര് നീക്കം ചെയ്യണമെന്നാണ് ഭക്തജനങ്ങളുടെ ആവശ്യം.
