ശബരിമല: ശബരിമല തന്ത്രി നിയമനത്തിന് മൂന്നംഗസമിതിയെ നിയോഗിച്ചെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് കെ ജയകുമാര്. തീരുമാനം ഹൈക്കോടതിയെ അറിയിക്കും
മകന് ബ്രഹ്മദത്തനെ ശബരിമല തന്ത്രിയാക്കണമെന്ന തന്ത്രി കണ്ഠരര് രാജീവരുടെ കത്ത് ദേവസ്വം ബോര്ഡ് പരിശോധിച്ചു. അതില് അന്തിമ തീരുമാനം ആയിട്ടില്ല. ഇതിനായി തലമുതിര്ന്ന മൂന്ന് തന്ത്രിമാരുടെ സമിതി രൂപികരിച്ചു. അവരുമായി ആശയവിനിമയം നടത്തി തന്റെ ശുപാര്ശ ബോര്ഡിന് മുന്നില് വയ്ക്കും. അതിനുശേഷം അക്കാര്യത്തില് അന്തിമതീരുമാനം ഉണ്ടാകും. ഹൈക്കോടതിയെ ഇക്കാര്യം അറിയിക്കും- കെ ജയകുമാര് പറഞ്ഞു.
ബ്രഹ്മദത്തനെ തന്ത്രിയാക്കുന്നതില് ബോര്ഡില് എതിര്പ്പില്ല.സമിതിയെ വച്ചത് ഇക്കാര്യത്തില് വിവാദം ഒഴിവാക്കാനുള്ള മുന്കരുതലിന്റെ ഭാഗമായാണെന്നും ജയകുമാര് പറഞ്ഞു. ശബരിമലയിലെ തീര്ഥക്കുള വിഷയത്തില് 2018ലെ ദേവപ്രശ്നത്തില് പറഞ്ഞിട്ടുള്ള പരിഹാരങ്ങളും പ്രായശ്ചിത്ത പൂജകളും നടത്താന് വ്യാഴാഴ്ചത്തെ ദേവസ്വം ബോര്ഡ് യോഗം തീരുമാനിച്ചു. ദേവപ്രശ്നത്തിലെ പരിഹാരപൂജകളില് ഗുരുവായൂരില് പാല്പായസം നടത്തുക മാത്രമാണ് ചെയ്തത്. വിവിധ ക്ഷേത്രങ്ങളില് ചെയ്യേണ്ട കാര്യങ്ങളുണ്ട്.പരിഹാരക്രിയകള്ക്കും മറ്റുമായി അഞ്ച് ലക്ഷം രൂപനീക്കി വച്ചു. പരിഹാരക്രിയയും പ്രായശ്ചിത്ത പൂജകളും നടത്തുന്നതോടെ തിരുവിതാംകൂര് ദേവസ്വം ബോര്ഡിന്റെ സുവര്ണകാലമാകുമെന്നും ജയകുമാര് പറഞ്ഞു.
