പയ്യന്നൂര്: കണ്ണൂര് ജില്ലയിലെ സിപിഎം പാര്ട്ടി ഗ്രാമങ്ങളില് നടക്കുന്ന കാട്ടുനീതിയെ ജനകീയ പ്രതിരോധമുയര്ത്തി നേരിടുമെന്ന് ബിജെപി സംസ്ഥാന സെക്രട്ടറി വി.കെ.സജീവന് പറഞ്ഞു. പയ്യന്നൂര് മേഖലയില് ബിജെപി പ്രവര്ത്തകര്ക്ക് നേരെ സിപിഎം ആസൂത്രിതമായി നടത്തുന്ന അക്രമങ്ങളില് പ്രതിഷേധിച്ച് ഇന്നലെ പയ്യന്നൂര് സിഐ ഓഫീസിലേക്ക് ബിജെപി പ്രവര്ത്തകര് നടത്തിയ മാര്ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
പാര്ട്ടി നയങ്ങള് അനുസരിച്ച് പാര്ട്ടിക്ക് വിധേയരാവുന്നവര് മാത്രം പാര്ട്ടി ഗ്രാമങ്ങളില് ജീവിച്ചാല് മതി എന്ന നയമാണ് സിപിഎം നടപ്പിലാക്കുന്നത്. ഇതിനായി ദളിത് സ്ത്രീകളെയും കുട്ടികളെയും അടക്കം അക്രമിക്കാന്പോലും അവര് തയ്യാറാകുന്നു. ഉത്തരേന്ത്യയില് ദളിതന്റെ നേരേ ആരെങ്കിലും നോക്കിയാല്പ്പോലും മാനവികതയുടയും ദളിത് സ്നേഹത്തിന്റെയും മുഖം മൂടിയണിഞ്ഞെത്തുന്നവര് ഇവിടെ നിരന്തരം ദളിത് വേട്ട നടത്തുകയാണ്. പയ്യന്നൂര് കോറോം ആലക്കാട്ട് ഗാന്ധിജയന്തി ദിനത്തില് ദളിത് സ്ത്രീകളെ മര്ദ്ദിച്ച സിപിഎം കാടത്തത്തിനെതിരെയും അക്രമങ്ങളില് ശക്തമായ നടപടികള് സ്വീകരിക്കാത്ത പോലീസിന്റെ നിസ്സംഗതക്കുമെതിരെയാണ് ബിജെപി പയ്യന്നൂര് സിഐ ഓഫീസിലേക്ക് മാര്ച്ച് സംഘടിപ്പിച്ചത്. കേരളം മുഴുവന് കൊലക്കത്തിയുമായി നടന്ന് കലാപമുണ്ടാക്കുന്നത് കണ്ണൂരില് നിന്നുള്ള സിപിഎമ്മുകാരാണ്. ഭീകരര്ക്ക് സുരക്ഷിത താവളമൊരുക്കുന്നതും അവരെ സംരക്ഷിക്കുന്നതും ഇവര് തന്നെ. പോലീസിന്റെ ഭാഗത്തുനിന്നും നീതിയുക്തമായ നടപടികള് ഉണ്ടായില്ലെങ്കില് സമരത്തിന്റെ രൂപവും ഭാവവും മാറ്റേണ്ടി വരുമെന്നും അദ്ദേഹം കൂട്ടിച്ചേര്ത്തു.
കെ.ബി.പ്രജില്, കെ.സജീവന് ആറളം, ബിജെപി സംസ്ഥാന സെല് കോഓര്ഡിനേറ്റര് കെ.രഞ്ജിത്ത്, ജില്ലാ പ്രസിഡണ്ട് പി.സത്യപ്രകാശന് മാസ്റ്റര്, കെ.കെ.വിനോദ്കുമാര്, കെ.രാധാകൃഷ്ണന്, ആനിയമ്മ രാലജന്ദ്രന്, കെ.കെ.സുകുമാരന് തുടങ്ങിയവര് പങ്കെടുത്തു.
നേരത്തെ പെരുമ്പയില് നിന്നാരംഭിച്ച പ്രകടനത്തിന് എം.പി.രവീന്ദ്രന്, ഗംഗന് തായിനേരി, എ.കെ.രാജഗോപാലന് മാസ്റ്റര്, ബിജെപി പയ്യന്നൂര് മണ്ഡലം പ്രസിഡണ്ട് ടി.രാമകൃഷ്ണന്, ജനറല് സെക്രട്ടറിമാരായ സി.കെ.രമേശന് മാസ്റ്റര്, പനക്കല് ബാലകൃഷ്ണന്, കല്ലാശ്ശേരി മണ്ഡലം ഭാരവാഹികളായ വിജയന് മാങ്ങാട്, കെ.സജീവന്, ശങ്കരന് കൈതപ്രം തുടങ്ങിയവര് നേതൃത്വം നല്കി. നൂറുകണക്കിന് ബിജെപി പ്രവര്ത്തകര് മാര്ച്ചില് അണിനിരന്നു.
