വിഴിഞ്ഞം: വയോജനദിനത്തിലെ പ്രാധാന്യത്തെക്കുറിച്ച് അറിയില്ലെങ്കിലും അവര് ഒത്തുകൂടി. ചെകിടടപ്പിക്കുന്ന പ്രസംഗങ്ങളോ ഉപദേശങ്ങളോ ഇല്ലാതെ തന്നെ ആ ചെറിയ കുഞ്ഞുങ്ങള് ഒരു കാര്യം തിരിച്ചറിഞ്ഞു. പ്രായപൂര്ത്തിയായവര് ആദരിക്കപ്പെടേണ്ടവര് ആണെന്ന യഥാര്ത്ഥം. ഈ പിഞ്ചു കുഞ്ഞുങ്ങളില് കൂടുതല് പേരും തങ്ങളുടെ മാതാപിതാക്കളെ മാത്രം കണ്ടു വളര്ന്നവര്. അവരെക്കാള് പ്രായക്കൂടുതല് ഉള്ള അപ്പൂപ്പന്മാരോടും അമ്മൂമ്മമാരോടുമുള്ള ഇടപഴകല് വേറിട്ട അനുഭവമാണ് എന്ന് ഈ പിഞ്ചുമക്കളുടെ മുഖങ്ങള് വ്യക്തമാക്കുന്നുണ്ടായിരുന്നു.
കല്ലിയൂര് പഞ്ചായത്തിലെ കുഴിതാലച്ചല് വാര്ഡിലെ രണ്ട് അംഗനവാടികള് ഒരുമിച്ച് ചേര്ന്നാണ് വ്യത്യസ്ഥമായ ഒരു പരിപാടി സംഘടിപ്പിച്ചത്. തണലേകിയവര്ക്ക് തണലേകാം എന്ന പേരിലാണ് പഴയ തലമുറയും പുതു തലമുറയും ഒത്തുചേര്ന്നത്. സമീപപ്രദേശങ്ങളിലുള്ള മാവിള, കല്ലുവിള എന്നീ അംഗന്വാടികള് സംയുക്തമായിട്ടാണ് വയോജനകളെ ആദരിക്കാനുള്ള പരിപാടി നടത്തിയത്. 96 വയസ്സുവരെയുള്ളവരാണ് പിഞ്ചുകുഞ്ഞുങ്ങളുടെ ആദരം ഏറ്റുവാങ്ങാന് അംഗനവാടികളില് എത്തിയത്. പൊന്നാട അണിയിച്ചും കാല്തൊട്ട് വന്ദിച്ചും കൊച്ചുവര്ത്തമാനങ്ങള് പറഞ്ഞും ഈ ദിവസം ഇരുകൂട്ടര്ക്കും മറക്കാനാവാത്ത അനുഭവങ്ങളായി മാറി. അണുകുടുംബങ്ങള് വ്യാപകമായതിനാല് ഒറ്റപ്പെടലിന്റെ വേദന അനുഭവിച്ചറിഞ്ഞ പലരും ഇക്കൂട്ടത്തില് ഉണ്ടായിരുന്നു. ചെറിയ രീതിയിലുള്ള ചായസത്ക്കാരത്തിന് ശേഷം പിരിയുമ്പോള് പലരുടേയും കണ്ണുകള് ഈറനണിയുന്നതും കാണാമായിരുന്നു. പരിപാടി അറിഞ്ഞ് താത്പര്യം പ്രകടിപ്പിച്ചെങ്കിലും എത്താനാകാത്ത തൊണ്ണൂറ്റിഒന്പത് വയസ്സായ അപ്പൂപ്പനെ വീട്ടിലെത്തി പൊന്നാട അണിയിക്കാനും ഈ കുഞ്ഞുങ്ങള് മറന്നില്ല.
വാര്ഡ് മെമ്പറായ രാജലക്ഷ്മിയാണ് ഇത്തരമൊരു കൂട്ടായ്മ സംഘടിപ്പിക്കാന് മുന്കൈ എടുത്തത്. ബന്ധങ്ങളുടെ ആഴവും തീവ്രതയും തിരിച്ചറിയാന് തലമുറകളുടെ കൂടിച്ചേരലുകള് ഇനിയും സംഘടിപ്പിക്കുമെന്ന് അവര് പറഞ്ഞു. പഞ്ചായത്ത് പ്രസിഡന്റ് ജയലക്ഷ്മി കൂട്ടായ്മ ഉദ്ഘാടനം ചെയ്തു. സ്റ്റാന്ഡിംഗ് കമ്മിറ്റി ചെയര്പേഴ്സണ് ശൈലജാ സുരേഷ് ബാബു, സുരേഷ് കുമാര്, അഭിലാഷ്, അനില്കുമാര്, നന്ദു എന്നിവര് നേതൃത്വം നല്കി. അംഗനവാടി ജീവനക്കാരായ ജയന്തി, സന്ധ്യ, മെഴ്സി, ബീന എന്നിവരും പരിപാടിയില് സംബന്ധിച്ചു.
