മൂവാറ്റുപുഴ: സ്വകാര്യ ചാനലായ ടിവി നൗവില് കെഎസ്ഐഡിസിയുടെ ഓഹരി നിക്ഷേപം സംബന്ധിച്ച് മുന് വ്യവസായ മന്ത്രി പി.കെ. കുഞ്ഞാലിക്കുട്ടിയുടെയും മകന് ഹാഷിക് പാണ്ടിക്കടവത്തിന്റെയും പങ്ക് അന്വേഷിക്കണമെന്ന് ആവശ്യപ്പെട്ട് വിജിലന്സ് കോടതിയില് ഉപഹര്ജി. പൊതുപ്രവര്ത്തകനായ ഗിരീഷ് ബാബുവാണ് ഹര്ജി നല്കിയത്. ജഡ്ജി പി. മാധവന് ഹര്ജി ഫയില് സ്വീകരിച്ച് 19 ലേയ്ക്ക് മാറ്റി.
ചാനലിനായി സര്ക്കാര് സ്ഥാപനമായ കെഎസ് ഐഡിസിയുടെ 3 കോടി 63 ലക്ഷം രൂപയുടെ ഓഹരി നിക്ഷേപം നടത്തിയത് ചട്ടങ്ങള് മറികടന്നാണെന്ന് ഹര്ജിയില് പറയുന്നു. മന്ത്രി പുത്രനും മറ്റും ചേര്ന്ന് ആരംഭിക്കുമെന്ന് പറഞ്ഞ ചാനല് നിലവില് പ്രവര്ത്തന രഹിതമാണ്. ഇതിന് സംപ്രേക്ഷണ അനുമതിയില്ല. ചാനലിനായി വാങ്ങിയ യന്ത്രോപകരണങ്ങള് മറിച്ചുവിറ്റതിന് കസ്റ്റംസ് വിഭാഗം അന്വേഷണം നടത്തുകയാണ്. യാതൊരു അന്വേഷണവും നടത്താതെയാണ് കെഎസ് ഐഡിസി ഓഹരി നിക്ഷേപം നടത്തിയത്. ചാനല് ഡയറക്ടര് ബോര്ഡ് അംഗങ്ങളില് ചിലര് ക്രിമിനല് കേസുകളില് പ്രതിയാണെന്നും ഹര്ജിയില് പറയുന്നു.
കെഎസ് ഐഡിസി മുന് ചെയര്മാന് ടി.കെ.എ നായര്, എംഡി അരുണാ സുന്ദര് രാജ്, എം. ബിന, സെക്രട്ടറി കെ. സുരേഷ് കുമാര്, ഡയറക്ടര് ബോര്ഡ് അംഗങ്ങളായ എ.എന്. മര്സൂക്. ബിജു ചെറിയാന്, മാത്യു ജോര്ജ്ജ് കുരുവിത്തടം, അക്ഷിത് തോമസ്, തോമസ് പൗലോസ്, ഇ.പി. ജോര്ജ്ജ്, മുഹമ്മദ് അഹമ്മദ്, മമ്മി അബ്ദുള്ള, ഉസ്മാന് കടവില്, ആന്റണി തോമസ്, സിയാദ് വെട്ടിക്കല്, ഷിബു പ്രഭാകരന്, ദീപക് കുമാര് ഷെട്ടി എന്നിവരാണ് എതിര് കക്ഷികള്.
