കണ്ണൂര്: കണ്ണൂര് നഗരത്തില് കൊലവിളിയുയര്ത്തി മുദ്രാവാക്യം മുഴക്കിയ സിപിഐ-എഐഎസ്എഫ് ക്രിമിനല് സംഘം താവക്കരയിലെ ജില്ലാ ബസ് ഓപ്പറേറ്റേഴ്സ് അസോസിയേഷന് ഓഫീസ് പൂര്ണമായും അടിച്ച് തകര്ത്തു. ഇരുമ്പ് ദണ്ഡ്, വടിവാള് തുടങ്ങിയ മാരാകായുധങ്ങളുമായാണ് ക്രിമിനല് സംഘം ഓഫീസില് അതിക്രമിച്ച് കടന്നത്. എഐഎസ്എഫ് ജില്ലാ സെക്രട്ടറി എം.മഹേഷിന്റെ നേതൃത്വത്തിലുള്ള സംഘമാണ് ഇന്നലെ ഉച്ചക്ക് 12 മണിയോടെ അക്രമം നടത്തിയത്. ഓഫീസിലേക്ക് പ്രകടനമായത്തിയ എഐഎസ്ഫ് ക്രിമിനല് സംഘം ഓഫീസിന്റെ ഗേറ്റ് തകര്ത്ത് കണ്ണില് കണ്ടതെല്ലാം അടിച്ചുതകര്ക്കുകയായിരുന്നു. ഓഫീസിനകത്തെ ഫയലുകള് പൂര്ണ്ണമായും നശിപ്പിച്ചു. മേശ, കസേര, ടെലിവിഷന്, ഷെല്ഫുകള് തുടങ്ങി ഓഫീസിനകത്തുള്ളതല്ലാം പൂര്ണ്ണമായും തകര്ത്ത നിലയിലാണ്. ഫ്രിഡ്ജ്, ഓഫീസിനകത്ത് വെള്ളം സൂക്ഷിക്കാനുള്ള സംവിധാനം തുടങ്ങിയവയെല്ലാം തകര്ത്തു. അസോസിയേഷന്റെ പ്രവര്ത്തനവുമായി ബന്ധപ്പെട്ട നിരവധി രേഖകള് പൂര്ണ്ണമായും നശിപ്പിക്കപ്പെട്ടു. ഒരു ലക്ഷം രൂപയുടെ നഷ്ടമുണ്ടെന്നാണ് പ്രാഥമികമായ വിലയിരുത്തല്. അക്രമം നടക്കുമ്പോള് ഓഫീസ് സെക്രട്ടറി ഉള്പ്പടെ മൂന്നോളം പേര് മാത്രമേ സ്ഥലത്തുണ്ടായിരുന്നുള്ളു. ഇവരെ കൊല്ലുമെന്ന് ഭീഷണി മുഴക്കിയാണ് ക്രിമിനല് സംഘം പിരിഞ്ഞ് പോയത്. അക്രമം നടന്നയുടന് തന്നെ കണ്ണൂര് ടൗണ് സ്റ്റേഷനില് പരാതി നല്കിയെങ്കിലും പോലീസ് സ്ഥലത്തെത്തി അന്വേഷണം നടത്താത്തതില് അസോസിയേഷന് ഭാരവാഹകള് കടുത്ത പ്രതിഷേധം രേഖപ്പെടുത്തി.
ബിഎംഎസ് ജില്ലാ വൈസ് പ്രസിഡണ്ട് പി.കൃഷ്ണന്, പ്രൈവറ്റ് ബസ്സ് ആന്റ് ഹെവി വെഹിക്കിള്സ് മസ്ദൂര് സംഘ് ജില്ലാ പ്രസിഡണ്ട് കെ.കെ.ശ്രീജിത്ത് തുടങ്ങിയവര് സംഭവസ്ഥലം സന്ദര്ശിച്ചു.
