കണ്ണൂര്: അറ്റുറ്റപ്പണി നടക്കുന്ന വലപട്ടണം പാലത്തിലൂടെ ഇന്നലെ മുതല് ഗതാഗത നിയന്ത്രണം ഏര്പ്പെടുത്തി. ബസ്സ്, ഇരുചക്ര, മുച്ചക്ര വാഹനങ്ങള്ക്ക് നിയന്ത്രണമര്പ്പെടുത്തിയിട്ടില്ല. എന്നാല് യാത്രാ കാറുകള് വഴിതിരിച്ചുവിട്ടത് ഏറെ യാത്രാ ക്ലേശമുണ്ടാക്കുന്നുണ്ട്. വാഹനങ്ങള് നിര്ദ്ദേശപ്രകാരമുള്ള റൂട്ടിലേക്ക് തിരിച്ചുവിടാന് ആവശ്യമായ പോലീസ് സംവിധാനമൊരുക്കിയിട്ടുണ്ടെന്നാണ് പോലീസ് മേധാവികള് നല്കുന്ന വിശദീകരണം. കോഴിക്കോട് ഭാഗത്തേക്ക് പോകുന്ന ചരക്ക് ലോറികള് തളിപ്പറമ്പ് ചിറവക്കില് നിന്നും തിരിഞ്ഞ് ശ്രീകണ്ഠാപുരം-ഇരിക്കൂര്-ചാലോട്-തലശ്ശേരി വഴിയാണ് പോകുന്നത്. കണ്ണൂര് ഭാഗത്തേക്ക് പോകുന്ന വാഹനങ്ങള് പറശ്ശിനിക്കടവ്-കരിങ്കല്ക്കുഴി, കൊളച്ചേരി മുക്ക്, കമ്പില്-നാറാത്ത്, കണ്ണാടിപ്പറമ്പ്-കക്കാട് വഴിയാണ് തിരിച്ച് വിടുന്നത്. ചെറിയ യാത്രക്ക് കണ്ണൂരില് നിന്ന് തളിപ്പറമ്പിലേക്കും തിരിച്ചും യാത്ര ചെയ്യുന്നവരാണ് ഗതാഗതനിയന്ത്രണം കൊണ്ട് ഏറെ ബുദ്ധിമുട്ടുന്നത്. വാഹനങ്ങള് തിരിച്ച് വിടുന്നത് ഇടുങ്ങിയ റോഡില്കൂടിയായതിനാല് ചില ഭാഗങ്ങളില് രൂക്ഷമായ ഗതാഗതക്കുരുക്ക് ഉണ്ടാക്കുന്നുണ്ട്. നവംബര് അഞ്ച് വരെയാണ് അറ്റകുറ്റപ്പണി നടക്കുക.
പാലത്തില് ഗതാഗത നിയന്ത്രണം തുടങ്ങിയതോടെ ജനങ്ങള് ദുരിതത്തിലായിരിക്കുകയാണ്.ബസുകള്, ഇരുചക്ര, മുച്ചക്ര വാഹനങ്ങള് ആംബുലന്സ്, സ്കൂള് വാഹനങ്ങള് എന്നിവ മാത്രമാണ് പാലത്തിലൂടെ കടത്തിവിടുന്നത്. പാലത്തിന് മുകളില് കോണ്ക്രീറ്റ് ഗ്രില്ലിംഗ് നടക്കുന്നതിനാല് ഒരു വശത്തുകൂടെ മാത്രമാണ് വാഹനങ്ങള് കടത്തിവിടുന്നത്. ഇത് കാരണം രാവിലെയും വൈകുന്നേരവുമാണ് ജനങ്ങള്ക്ക് കുടുതലും ദുരിതമുണ്ടാകുന്നത്. തളിപ്പറമ്പ്, കണ്ണപുരം, വളപട്ടണം പോലീസ് സ്റ്റേഷനുകളിലെ ഇരുപതോളം പോലീസുകാരെയാണ് വാഹന നിയന്ത്രണത്തിനും വഴിതിരിച്ചു വിടാനും നിയോഗിച്ചിരിക്കുന്നുണ്ടെങ്കിലും വാഹനങ്ങളെ നിയന്ത്രിക്കാന് ഇവര്ക്ക് കഴിയുന്നില്ല.
തളിപ്പറമ്പ് ചിറവക്ക് ജംഗ്ഷനിലും പുതിയ തെരുവിലും വാഹനങ്ങള് വഴിതിരിച്ചു വിടുന്നത് വന് ഗതാഗത കുരുക്കിന് കാരണമായിട്ടുണ്ട്. എന്നാല് ചുങ്കം മുതല് ധര്മ്മശാല വരെ ദേശീയപാത ഏറെക്കുറെ തിരക്കൊഴിഞ്ഞ അവസ്ഥയിലാണ്.
