റിയാദ്: ആനുകൂല്യങ്ങള് കിട്ടിയെന്ന് എഴുതിക്കൊടുത്താലേ പാസ്പോര്ട്ടു തിരികെ നല്കൂ എന്ന് സൗദിയിലെ സ്വകാര്യ കമ്പനികള്. ഇതെത്തുടര്ന്ന് യുണൈറ്റഡ് സീമാക് കമ്പനിക്കെതിരേ ജീവനക്കാര് പ്രകടനം നടത്തി. കമ്പനി ഉടമയുടെ വീട്ടിനുമുന്നിലും പ്രകടനം നടത്താന് ഒരുങ്ങുകയാണവര്. ഭാരതം, പാക്കിസ്ഥാന്, ഫിലിപ്പീന്സ് എന്നിവിടങ്ങളില് നിന്നുള്ളവരാണ് കബളിപ്പിക്കപ്പെട്ടവരധികവും.
യുണൈറ്റഡ് സീമാക്കില് 14 മുതല് 20 മാസമായി ശമ്പളമില്ലാതെ 500 പേരോളം ജോലി ചെയ്യുന്നു. പലരുടെയും പാസ്പോര്ട്ട് കമ്പനി മടക്കിക്കൊടുക്കുന്നില്ല. കാലാവധി കഴിഞ്ഞവ പുതുക്കാന് പോലുമായില്ല. പാസ്പോര്ട്ട് ചോദിക്കുന്നവരോട് ആനുകൂല്യങ്ങള് മുഴുവന് കിട്ടിയെന്ന് എഴുതിക്കൊടുക്കണമെന്നാണ് പറയുന്നത്, വ്യക്തിവിവരങ്ങള് കൂടുതല് വെളിപ്പെടുത്താതെ ഭാട്ടിയെന്ന തൊഴിലാളി പറഞ്ഞു.
”കമ്പനി ഞങ്ങള്ക്ക് ഒരുക്കിയിരിക്കുന്ന താമസസ്ഥലത്ത് തടവുകാരെ പോലെയാണ്. ആഹാരമില്ല, ശുചിമുറിയില് വെള്ളമില്ല. അടുത്തുള്ള പള്ളിയില് പോയാണ് ശൗചം ചെയ്യുന്നത്. അനുദിനം സ്ഥിതി മോശമാകുകയാണ്. ചിലര് മറ്റു സ്ഥാപനങ്ങളില് ജോലി നേടി. അവര്ക്കും സീമാക്ക് പാസ്പേര്ട്ട് മടക്കി നല്കുന്നില്ല,” ഭാട്ടി പറഞ്ഞു.
കമ്പനിയുടെ ജനറല് മാനേജര് അബു മൊഹമ്മദ് പറയുന്നത്, സര്ക്കാര് കരാര് പ്രകാരമുള്ള പണം നല്കാത്തതിനാലാണ് ശമ്പളം നല്കാത്തതെന്നാണ്. പാക്കിസ്ഥാന് എംബസി രണ്ടാഴ്ചക്കിടെ രണ്ട് ചര്ച്ചകള് കമ്പനിയുമായി നടത്തി. ഫലമുണ്ടായില്ലെന്ന് തൊഴിലാളികള് പറയുന്നു.
