മട്ടന്നൂര്: കണ്ണൂര് അന്താരാഷ്ട്ര വിമാനത്താവളത്തിന്റെ ലൈറ്റ് അപ്രോച്ചിനായി ഏറ്റെടുക്കുന്ന ഭൂമിയുടെ സര്വ്വേ റിപ്പോര്ട്ട് തയ്യാറായി. കല്ലേരിക്കര- പാറാപ്പൊയില് മേഖലയില് 774മീറ്റര് നീളത്തിലും 37.27മീറ്റര് വീതിയിലുമായി 7.14ഏക്കര് സ്ഥലം ഏറ്റെടുക്കുവാനായിരുന്നു തുടക്കത്തില് ഉദ്ദേശമെങ്കിലും ഇപ്പോള് 900 മീറ്റര് നീളത്തിലും 37.2മീറ്റര് വീതിയിലുമായി 8.29ഏക്കര് സ്ഥലം ഏറ്റെടുക്കുവാനാണ് ശ്രമം.
ആദ്യ ഘട്ടത്തില് 26വീടുകള് ഏറ്റെടുക്കുവാന് ഉദ്ദേശിച്ചപ്പോള് നീളം 900മീറ്ററായി വര്ധിച്ചതോടെ 36വീടുകള് കുടിയൊഴിപ്പിക്കേണ്ടി വരും. ഇതിനുള്ള സര്വ്വേയാണ് പൂര്ത്തിയായത്. ഭൂമി ഏറ്റെടുക്കുമ്പോള്, രണ്ടാംഘട്ടത്തില് പുനരധിവാസത്തിനായി നല്കിയ കല്ലേരിക്കര- കൊക്കയില് സ്ഥലത്ത് നിര്മ്മിച്ച ഒരു വീട് ഉള്ക്കൊള്ളുന്നതിനാല് ഇത് ഒഴിവാക്കുന്നതിനായി ഈ ഭാഗത്ത് 5മീറ്ററോളം വീതികുറച്ചാണ് സര്വ്വേ നടത്തിയത്. സ്കെച്ച് പ്ലാന് പൂര്ത്തിയായാല് പ്രദേശത്തെ സമരരംഗത്തുള്ള കര്മ്മസമിതിയുമായി ചര്ച്ച നടത്തുവാനാണ് കിയാലിന്റെ ശ്രമം.
കൂടുതല് വീടുകള് ഏറ്റെടുക്കരുതെന്ന് ആവശ്യപ്പെട്ട് കര്മ്മസമിതി ചെയര്മാന് എം.സി കുഞ്ഞമ്മദ് മാസ്റ്റര്, ഭാരവാഹികളായ ടി.ദിനേശന്, എ കെ രാജേഷ്, കെ.പി.ഗംഗാധരന്, റസാഖ് മണക്കായി എന്നിവര് കിയാല് മാനേജിംഗ് ഡയറക്ടര് വി തുളസിദാസിന് നിവേദനം നല്കി. ഏറ്റെടുക്കുന്ന വീടുകളിലെ കുടുംബങ്ങളെ ബുദ്ധിമുട്ടിക്കാത്ത തരത്തിലായിരിക്കും പ്രവര്ത്തനങ്ങളെന്ന് തുളസീദാസ് അറിയിച്ചതായി എം.സി.കുഞ്ഞമ്മദ് മാസ്റ്റര് പറഞ്ഞു. വിമാനത്താവള റണ്വേയുടെ നീളം 3050മീറ്ററില് നിന്നു 3400മീറ്ററായി വര്ദ്ധിപ്പിക്കുന്നതിന്റെ ഭാഗമായാണ് ലൈറ്റ് അപ്രോച്ചിനായി പാറാപ്പൊയില് മേഖലയില് ഭൂമി ഏറ്റെടുക്കുന്നത്. ലൈറ്റ് അപ്രോച്ചിനു പുറമേ റണ്വേയ്ക്ക് അധികമായി വരുന്ന 350മീറ്റര് നീളത്തിനായി കാനാട് മേഖലയില് 64.18ഏക്കര് സ്ഥലവും ഇനി ഏറ്റെടുക്കണം. ഇതിനിടെ അടുത്ത മാര്ച്ചില് യാത്രാവിമാനം ഇറങ്ങുവാന് പാകത്തില് മൂര്ഖന്പറമ്പില് നിര്മ്മാണ പ്രവര്ത്തനങ്ങള് അതിവേഗം പുരോഗമിക്കുകയാണ്.
