സ്വന്തം ലേഖകന്
തിരുവനന്തപുരം: ശ്രീ പത്മനാഭ സ്വാമിക്ഷേത്രത്തില് എക്സിക്യുട്ടീവ് ഓഫീസറും സുരക്ഷാ വിഭാഗവും തമ്മില് തുറന്നപോരിലേക്ക്. ക്ഷേത്ര സുരക്ഷയ്ക്കായി പോലീസ് തയ്യാറാക്കുന്ന ക്ഷേത്ര മൈത്രി സുരക്ഷാ സംവിധാനത്തിനെതിരെയാണ് എക്സിക്യുട്ടീവ് ഓഫീസര് കെ.എന്. സതീഷ് കുമാര് രംഗത്തെത്തിയിരിക്കുന്നത്.
ക്ഷേത്രത്തിന്റെ സുരക്ഷാ ക്രമീകരണങ്ങള് വര്ദ്ധിപ്പിക്കുന്നതിന്റെ ഭാഗമായി ജനമൈത്രി പോലീസ് മാതൃകയില് ക്ഷേത്ര മൈത്രി സുരക്ഷാ സമിതി രൂപീകരിക്കുവാന് സുരക്ഷാ വിഭാഗം തീരുമാനിച്ചു. ഇതിന്റെ അടിസ്ഥാനത്തില് സമീപവാസികള്, വ്യാപാരികള്, ഓട്ടോറിക്ഷാ തൊഴിലാളികള്, റസിഡന്റ്സ് അസോസിയേഷനുകള് തുടങ്ങിയവരെ ഉള്പ്പെടുത്തി ക്ഷേത്രത്തിന് പുറത്ത് സുരക്ഷ ഒരുക്കുക എന്നതാണ് പദ്ധതി. ഈ വിവരം ചൂണ്ടിക്കാട്ടി ഡിസിപി തമ്പി എസ്. ദുര്ഗ്ഗാദത്ത് എക്സിക്യുട്ടീവ് ഓഫീസര്ക്ക് കത്തെഴുതി. ഇന്ന് നടക്കുന്ന പ്രാഥമിക യോഗത്തിലേക്ക് ക്ഷണിക്കുകയും ചെയ്തു. എന്നാല് സമിതി രൂപീകരണം സുപ്രീംകേടതിയ്ക്ക് എതിരാണെന്നും അത് പാടില്ലെന്നും കാട്ടി ഡിസിപിയ്ക്ക് മറുപടി നല്കി. ഇതോടെയാണ് ഇരുവിഭാഗവും തുറന്നപോരിലേക്ക് എത്തിയത്.
ക്ഷേത്ര സുരക്ഷാ പോലീസ് ആണ് തീരുമാനിക്കുന്നതെന്നും ഇക്കാര്യത്തില് എക്സിക്യുട്ടീവ് ഓഫീസര്ക്ക് യാതൊരു അധികാരവും ഇല്ലെന്നും കാട്ടി ഡിസിപി മറുപടി നല്കി. ഇന്ന് വൈകുന്നേരം 4 മണിക്ക് വടക്കേനടയിലെ പോലീസ് ബാരക്കില് സമിതിയുടെ ആദ്യയോഗം നടക്കുമെന്ന് ക്ഷേത്ര സുരക്ഷാ വിഭാഗം അറിച്ചു. ക്ഷേത്രത്തില് അനധികൃത വയര്ലസ്സ് സെറ്റ് അനുവദിച്ചതിന് എക്സിക്യുട്ടീവ് ഓഫീസര്ക്കെതിരെ പോലീസ് കേസെടുത്ത് അന്വേഷണം നടത്തിവരികയാണ്.
