ചേര്ത്തല: സെന്റ് മൈക്കിള്സ് കോളജ് എന്എസ്എസിന്റെയും ആലപ്പുഴ രൂപത സൊസൈറ്റിയുടെയും നേതൃത്വത്തില് അര്ത്തുങ്കല്, ചേന്നവേലി, ചെത്തി പൊഴിയോരങ്ങളില് തീരസംരക്ഷണാര്ഥം കണ്ടല്ചെടികള് നട്ടുവളര്ത്തി ജൈവവേലി നിര്മിക്കുന്നു. ഇതിന്റെ ഭാഗമായി ആദ്യഘട്ടത്തില് അയ്യായിരം കണ്ടല്ചെടികള് നട്ടുപിടിപ്പിക്കും.
അര്ത്തുങ്കല് പൊഴിയോരത്തു കണ്ടല്ചെടികളുടെ നടീല് മന്ത്രി പി.തിലോത്തമന് ഉദ്ഘാടനം ചെയ്തു. അര്ത്തുങ്കല് ബസിലിക്ക റെക്ടര് ഫാ. ക്രിസ്റ്റഫര് എം.അര്ഥശേരില് അധ്യക്ഷത വഹിച്ചു. സെന്റ് മൈക്കിള്സ് കോളജ് അസി. മാനേജര് ഫാ. സെലസ്റ്റിന് പുത്തന്പുരയ്ക്കല്, ഫാ. ഡിക്സി ഫേബര്, എന്എസ്എസ് പ്രോഗ്രാം ഓഫിസര്മാരായ പ്രഫ. പി.പ്രതീഷ്, പ്രഫ. ജോസഫ് ലിബിന്, വൊളന്റിയര് സെക്രട്ടറി എച്ച്.അരുണ്കുമാര്, സിസിലി ടോണി എന്നിവര് പ്രസംഗിച്ചു.
സാമൂഹിക പ്രവര്ത്തക അമൃത സെബാസ്റ്റ്യന് കണ്ടല്ക്കാടുകളും ജൈവവൈവിധ്യവും എന്ന വിഷയത്തില് കുട്ടികള്ക്കു ക്ലാസെടുത്തു. തുടര്ന്ന് എന്എസ്എസ് വൊളന്റിയര്മാര് അര്ത്തുങ്കല് മുതല് മാരാരിക്കുളം വരെ തീരസംരക്ഷണ സന്ദേശ പദയാത്രയും നടത്തി. ചേര്ത്തല തെക്ക് പഞ്ചായത്തിനെ സമ്പൂര്ണ ശുചിത്വ പഞ്ചായത്താക്കുവാനുള്ള ശ്രമത്തിന്റെ ഭാഗമായാണു പദയാത്ര നടത്തിയത്.
തീരദേശത്തെ മലവിസര്ജനം, മാലിന്യങ്ങള് വലിച്ചെറിയല്, ഇതിലൂടെയുണ്ടാകുന്ന രോഗങ്ങള്, ആരോഗ്യപ്രശ്നങ്ങള്, പരിഹാരങ്ങള് എന്നിവയടങ്ങുന്ന ലഘുലേഖകളും വിതരണം ചെയ്തു.
