നെയ്യാര് ഡാമില് സുരക്ഷാ വാതിലുകളില്ലാതെ പ്രവര്ത്തിക്കുന്ന ആകാശ ഊഞ്ഞാല്
കാട്ടാക്കട: ഓണം വാരാഘോഷത്തിന്റെ ഭാഗമായി നെയ്യാര്ഡാമില് ആകാശ ഊഞ്ഞാല് പ്രവര്ത്തിച്ചത് സുരക്ഷാമാനദണ്ഡങ്ങള് പാലിക്കാതെ. കൊല്ലംകോട് രാജ്കമല് അമ്യൂസ്മെന്റ്സ് എന്ന സ്വകാര്യസ്ഥാപനമാണ് ഇവിടെ റെയ്ഡുകള് സ്ഥാപിച്ചത്.
കാലപ്പഴക്കത്താല് ദ്രവിച്ചു തുടങ്ങിയ യന്ത്രവത്കൃത റെയ്ഡുകളായിരുന്നു നെയ്യാര്ഡാമില് സഞ്ചാരികള്ക്കായി ഒരുക്കിയത്. കള്ളിക്കാട് ഗ്രാമ പഞ്ചായ
ത്തിന്റെ അനുമതിയോടെ 12 മുതല് 17 വരെ പ്രവര്ത്തിക്കാനായായിരുന്നു അനുമതി. എന്നാല് അടുത്തദിവസവും റെയ്ഡ് അനധികൃതമായി പ്രവര്ത്തിക്കുകയായിരുന്നു. അമ്യൂസ്മെന്റ് പാര്ക്ക് സുരക്ഷിതമല്ലെന്ന് കണ്ടതിനാല് 12ന് റെയ്ഡിന്റെ പ്രവര്ത്തനം തടഞ്ഞുകൊണ്ട് നെയ്യാര് ഡാം എസ്ഐ കിരണ് കരാറുകാരന് നോട്ടീസ് നല്കി. ഫയര് ആന്റ് സേഫ്റ്റി സര്ട്ടിഫിക്കറ്റും ഫയര് ഫോഴ്സിന്റെ അനുമതിയും വാങ്ങി മാത്രമേ പ്രവര്ത്തിക്കാവൂ എന്ന് പോലീസ് നിര്ദ്ദേശം നല്കി.
എന്നാല് അന്നു വൈകിട്ടോടെ ഫയര് ഫോഴ്സിലെ ഉന്നതരെ സ്വാധീനിച്ച് പ്രവര്ത്തനാനുമതി വാങ്ങി. യാതൊരു സുരക്ഷയുമില്ലാത്ത ആകാശ ഊഞ്ഞാലിന് ഫയര്ഫോഴ്സ് എങ്ങനെ പ്രവര്ത്തനാനുമതി നല്കി എന്നത് ദുരൂഹമാണ്. പഞ്ചായത്തിന്റെയും ഫയര് ഫോഴ്സിന്റെയും അനുമതി ഉള്ളതിനാല് പോലീസിന് മൗനം പാലിക്കേണ്ടിവന്നു. ഇതോടെ സുരക്ഷാ വാതിലുകളില്ലാത്ത ആകാശയന്ത്ര ഊഞ്ഞാലില് (ജയിന്റ് വീല്) കുട്ടികളെയും മുതിര്ന്നവരെയും കുത്തിനിറച്ച് കറക്കം തുടങ്ങി.
പത്തനംതിട്ടയില് രണ്ട് പിഞ്ചുകുട്ടികളുടെ മരണത്തിന് ഇടയാക്കിയതും ഇത്തരത്തില് സുരക്ഷാ മാനദണ്ഡങ്ങള് പാലിക്കാതെ ആകാശ കറക്കം നടത്തിയ ഊഞ്ഞാലായിരുന്നു. സീസണ് ആരംഭിക്കുമ്പോള് പഴയ റെയ്ഡ് ഉപകരണങ്ങള് നിറം പൂശി മിനുക്കി മേളകള്ക്കെത്തുന്നവര്ക്ക് യാതൊരു തടസവുമില്ലാതെ അനുമതി നല്കുകയാണ് സര്ക്കാര് വകുപ്പുകള്. വലിയ ആളുകള്ക്ക് ഇരിക്കാന് കണക്കാക്കി രൂപകല്പ്പന ചെയ്തിട്ടുള്ള തൊട്ടികളാണ് ആകാശ ഊഞ്ഞാലില് സ്ഥാപിച്ചിട്ടുള്ളത്.
കൊച്ചുകുട്ടികള് ഇതിനുള്ളില് ഇരിക്കുമ്പോള് ശക്തമായ കറക്കത്തിനിടെ ഇരിപ്പിടത്തില് നിന്ന് ഊര്ന്നുവീഴാന് സാധ്യതയുണ്ട്. വാതില്, സുരക്ഷാ ബെല്റ്റ് എന്നിവ ഇല്ലാത്തതിനാല് അപകടസാധ്യത കൂടുതലാണ്. ചോദിക്കുന്ന പണം നല്കി പഞ്ചായത്ത് അധികൃതരെയും മറ്റ് വകുപ്പ് ഉദ്യോഗസ്ഥരെയും വരുതിക്ക് നിര്ത്തുന്ന ഇക്കൂട്ടര്ക്കെതിരെ പരിശോധനകള് പ്രഹസനമാകുന്ന കാഴ്ചയാണ് കണ്ടുവരുന്നത്.
