പോങ്ങ്യാങ്ങ്: ഉത്തരകൊറിയക്ക് 20 അണുബോംബ് ഉണ്ടാക്കാനുള്ള ശേഷിയുണ്ടെന്ന് വിദഗ്ധര്. അതിനുള്ള സമ്പുഷ്ട യുറേനിയവും പ്ലൂട്ടോണിയവും അവരുടെ കൈവശമുണ്ട്. ഈ വര്ഷം അവസാനത്തോടെ അവര്, ഇവ നിര്മ്മിക്കും.
കൊറിയന് മേഖലയെ യുദ്ധത്തിലേക്ക് തള്ളിവിടാനാണ് അമേരിക്കന് പദ്ധതിയെന്ന് കൊറിയ ആരോപിക്കുന്നതിനിടെയാണ് ഈ കണ്ടെത്തല്. കഴിഞ്ഞ ദിവസം രണ്ട് യുഎസ് ബോംബറുകള് കൊറിയന് മേഖലയില് പറന്നിരുന്നു. ഉത്തരകൊറിയ നിരന്തരം മിസൈലുകള് പരീക്ഷിക്കുന്നതിന്റെയും ആണവപരീക്ഷണം നടത്തിയതിന്റെയും പശ്ചാത്തലത്തിലായിരുന്നു ബോംബറുകളുടെ പറക്കല്.
യുഎന് അടക്കമുള്ളവയുടെ എതിര്പ്പുകള് അവഗണിച്ച് ഉത്തരകൊറിയ ഒരു പതിറ്റാണ്ടായി സമ്പുഷ്ട യുറേനിയം വികസിപ്പിച്ചുവരികയായിരുന്നു. പ്രതിവര്ഷം 150 കിലോ സമ്പുഷ്ട യുറേനിയമാണ് അവര് ഉല്പ്പാദിപ്പിക്കുന്നത്.
ഇത് വര്ഷം ആറ് അണുബോംബുകള് നിര്മ്മിക്കാന് മതിയാകും. ഇതിനു പുറമേ 54 കിലോ പ്ലൂട്ടോണിയമാണ് അവരുടെ കൈവശമുള്ളത്. കഴിഞ്ഞാഴ്ച അവര് ആണവ പരീക്ഷണം നടത്തി. ഉടന് ഒരു പരീക്ഷണത്തിനു കൂടി ഒരുങ്ങുകയാണ്. വലിയ യുറേനിയം ശേഖരം തന്നെ അവര്ക്കുണ്ട്. പദ്ധതി അവര് വന്തോതില് വികസിപ്പിച്ചിട്ടുമുണ്ട്.
