കോഴിക്കോട്: മാതാ പേരാമ്പ്രയിലെ കലാകാരന്മാരുടെ സ്വാഗതനൃത്തശില്പത്തോടെ ജില്ലാതല ഓണം വാരാഘോഷത്തിന് അരങ്ങുണര്‍ന്നു. ഇന്നലെ വൈകീട്ട് കോഴിക്കോട് കടപ്പുറത്തെ പ്രധാന വേദിയില്‍ ഉദ്ഘാടന ചടങ്ങുകള്‍ക്ക് തൊട്ടുമുമ്പായിരുന്നു മാതായിലെ പ്രവര്‍ത്തകര്‍ ഓണാഘോഷത്തിലേക്ക് ഏവ രെയും സ്വാഗതമോതികൊണ്ട് അരങ്ങിലെ ത്തിയത്. അജയ്യ സുന്ദരഭൂമി… അതുല്ല്യ മംഗള ഭൂമി എന്നു തുടങ്ങിയ ഗാനത്തിനൊപ്പം കലാ കാരന്മാര്‍ ചുവടുവെച്ചു.
ഭാരതത്തിന്റെ പൈതൃകവും സനാതന സംസ്‌കൃതിയും സ്വാതന്ത്ര്യസമര ചരിത്രവുമെല്ലാം നൃത്തശില്പത്തിന്റെ ആദ്യഭാഗങ്ങളില്‍ പ്രതി പാദിക്കപ്പെട്ടു. കേരളത്തിന്റെ കലാ സാംസ്‌ക്കാ രിക പാരമ്പര്യം വിളിച്ചോതുന്നതായിരുന്നു തുടര്‍ന്നുള്ള ഭാഗങ്ങള്‍. കലാകൈരളിക്ക് പ്രണാമര്‍പ്പിച്ചാണ് നൃത്തശില്പം സമാപിച്ചത്. മാതാ പേരാമ്പ്രയിലെ നാല്പതോളം കലാകാരന്മാരാണ് അരങ്ങിലെത്തിയത്. 15 മിനുറ്റ് നീണ്ട സംഗീത കാവ്യ ദൃശ്യാവിഷ്‌കാരം കനകദാസ് പേരാമ്പ്രയാണ് സംവിധാനം ചെയ്തിരിക്കുന്നത്. രചന കവി പി.കെ. ഗോപിയും നൃത്തസംവിധാനം ഡോ. ലജ്‌നയും സംഗീത സംവിധാനം നിര്‍വ്വഹിച്ചത് സുരേന്ദ്രനുമാണ്.
ഓണാഘോഷത്തിന്റെ ഔദ്യോഗിക ഉദ്ഘാടനം മന്ത്രി ടി.പി. രാമകൃഷ്ണനും കലാപരിപാടികളുടെ ഉദ്ഘാടനം സംവിധായകന്‍ പ്രിയദര്‍ശനും നിര്‍വ്വഹിച്ചു. ചെറുപ്പത്തില്‍ സിനിമകാണാന്‍ കിട്ടുന്ന അവസരം ഓണം മാത്രമായിരുന്നെന്നും, സിനിമയുടെ ലോകത്തേക്ക് തന്നെ നയിച്ചത് ഓണമാണെന്നും അദ്ദേഹം പറഞ്ഞു. കോഴിക്കോടിന്റെ സിനിമാ അനുഭവങ്ങളും പങ്കുവച്ചു.
എ. പ്രദീപ്കുമാര്‍ എംഎല്‍എ അദ്ധ്യക്ഷത വഹിച്ചു. മേയര്‍ തോട്ടത്തില്‍ രവീന്ദ്രന്‍, ഡെപ്യൂട്ടി മേയര്‍ മീരാദര്‍ശക്, ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, മുന്‍മേയര്‍ എം. ഭാസ്‌കരന്‍, കൗണ്‍സിലര്‍ അഡ്വ. ടി. തോമസ് മാത്യു, അസിസ്റ്റന്റ് കളക്ടര്‍ ഇമ്പശേഖര്‍ തുടങ്ങിയവര്‍ പങ്കെടുത്തു. കലക്ടര്‍ എന്‍. പ്രശാന്ത് സ്വാഗതവും എഡിഎം ടി. ജെനില്‍ കുമാര്‍ നന്ദിയും പറഞ്ഞു.
കലാമണ്ഡലം വാദ്യ സംഘത്തിന്റെ പഞ്ചവാദ്യ ത്തോടെയാണ് വൈകീട്ട് പരിപാടികള്‍ ആരംഭിച്ചത്. ഉദ്ഘാടന ചടങ്ങിനുശേഷം റിമിടോമി അവതരിപ്പിച്ച സംഗീത സായാഹ്നം കാണികളെ ആവേശത്തി ലാഴ്‌ത്തി. ശേഷം നിര്‍മ്മല്‍ പാലാഴിയും സംഘവും കോമഡി ഷോ അവതരിപ്പിച്ചു.
