സമ്പൂര്‍ണ ശൗചാലയം ഭരണിക്കാവ് ബ്ലോക്ക് മുന്നില്‍

ആലപ്പുഴ: ജില്ലയില്‍ സമ്പൂര്‍ണ ശൗചാലയപ്രഖ്യാപനവുമായി ബന്ധപ്പെട്ടുള്ള പ്രവര്‍ത്തനങ്ങളില്‍ ഭരണിക്കാവ് ബ്ലോക്ക് ഏറെ മുന്നില്‍. ഭരണിക്കാവ് ബ്ലോക്കിലെ പഞ്ചായത്തുകളില്‍ ലക്ഷ്യമിട്ടിരുന്ന 1236 ശൗചാലയങ്ങളില്‍ 1111 എണ്ണവും പണി പൂര്‍ത്തിയാക്കിയിട്ടുണ്ട്. ജില്ലാ തലത്തില്‍ ലക്ഷ്യമുട്ടിരുന്നതിന്റെ 55 ശതമാനം ശൗചാലയങ്ങളുടെ നിര്‍മാണം ഇതുവരെ പൂര്‍ത്തിയാക്കിയതായി മന്ത്രി ജി.സുധാകരന്‍ പറഞ്ഞു. അവലോകന യോഗത്തില്‍ പ്രവര്‍ത്തികളുടെ പുരോഗതി വിലയിരുത്തുകയായിരുന്നു മന്ത്രി.

ജില്ലാ പഞ്ചായത്തിലും ബ്ലോക്ക് പഞ്ചായത്തുകളിലും എല്ലാ പഞ്ചായത്തുകളിലും കളക്‌ട്രേറ്റിലും സമ്പൂര്‍ണ ശൗചാലയ നിര്‍മാണവുമായി ബന്ധപ്പെട്ട പ്രത്യേക കൗണ്ടര്‍ ആരംഭിക്കാന്‍ മന്ത്രി നിര്‍ദ്ദേശം നല്‍കി. ജില്ലയിലെ പട്ടികജാതി-വര്‍ഗ കുടുംബങ്ങള്‍ക്ക് കക്കൂസ് സൗകര്യമുണ്ടോ എന്ന വിവരം ശേഖരിക്കാനും ഇല്ലാത്തവര്‍ എല്ലാവരും നിലവിലെ പദ്ധതിയില്‍പ്പെട്ടിട്ടുണ്ടെന്ന് ഉറപ്പിക്കാനും ഇവര്‍ താമസിക്കുന്ന ഏതെങ്കിലും ഭാഗങ്ങള്‍ ദുര്‍ഘടമേഖലയായി തിട്ടപ്പെടുത്തിയിട്ടുണ്ടെങ്കില്‍ അധിക തുകയ്‌ക്ക് എസ്റ്റിമേറ്റ് തയ്യാറാക്കുന്നതിന് എല്ലാ സഹായവും ചെയ്തുകൊടുക്കാനും പട്ടികജാതി വികസന ഉദ്യോഗസ്ഥര്‍ക്ക് നിര്‍ദ്ദേശം നല്‍കാന്‍ ജില്ലാ പട്ടികജാതി വികസന ഓഫീസറെ മന്ത്രി ചുമതലപ്പെടുത്തി.

ജില്ലാ പഞ്ചായത്ത് അഞ്ച് പേരടങ്ങുന്ന സംഘത്തെ നിയോഗിച്ച് എല്ലാ പഞ്ചായത്തുകളും സന്ദര്‍ശിക്കാനും പദ്ധതി പുരോഗതി വിലയിരുത്താനും മന്ത്രി നിര്‍ദ്ദേശം നല്‍കി. ജില്ലാ പഞ്ചായത്ത് പ്രസിഡന്റ് , വൈസ് പ്രസിഡന്റ്, മൂന്ന് സ്റ്റാന്‍ഡിങ് കമ്മറ്റിയംഗങ്ങള്‍ എന്നിവരടങ്ങിയ സംഘമാണ് പദ്ധതി പുരോഗതി ഓരോ പഞ്ചായത്തിലും എത്തി വിലയിരുത്തേണ്ടത്. 17 മുതല്‍ സമിതി സന്ദര്‍ശനം നടത്തണം.

ഭരണിക്കാവ് ബ്ലോക്കിലെ പഞ്ചായത്തുകളില്‍ ശൗചാലയ നിര്‍മ്മാണത്തിന് ലക്ഷ്യമിട്ടിരുന്നതിന്റെ 84 ശതമാനവും നിര്‍മ്മാണം പൂര്‍ത്തിയാക്കി. കഞ്ഞിക്കുഴി ബ്ലോക്കിലുള്ള പഞ്ചായത്തുകളില്‍ ലക്ഷ്യം വച്ച 74 ശതമാനം ശൗചാലയങ്ങളുടെയും പണി പൂര്‍ത്തിയാക്കി. കഞ്ഞിക്കുഴി ബ്ലോക്ക് പദ്ധതിയുടെ പുരോഗതിയില്‍ രണ്ടാം സ്ഥാനത്താണ്. മുതുകുളം(72), ആര്യാട്(70), വെളിയനാട്(63), അമ്പലപ്പുഴ(51) തുടങ്ങി ആറു ബ്ലോക്കുകളില്‍ 50 ശതമാനത്തിലധികം ശൗചാലയങ്ങളുടെ പണി പൂര്‍ത്തിയാക്കിയിട്ടുണ്ട്.

ഹരിപ്പാട്(48), ചെങ്ങന്നൂര്‍(45), തൈക്കാട്ടുശ്ശേരി(43), മാവേലിക്കര(40), ചമ്പക്കുളം(35), പട്ടണക്കാട്(32) എന്നീ ബ്ലോക്കുകളിലെ ശൗചാലയ നിര്‍മാണ പ്രവര്‍ത്തികളില്‍ 50 ശതമാനത്തില്‍ താഴെ മാത്രമേ പൂര്‍ത്തിയാക്കാന്‍ കഴിഞ്ഞിട്ടുള്ളൂവെന്ന് യോഗം വിലയിരുത്തി. ജില്ലയില്‍ ആകെ 14985 ശൗചാലയങ്ങളാണ് നിര്‍മിക്കാനുള്ളത്. മുഴുവന്‍ പഞ്ചായത്തുകളും കരാര്‍ നടപടികള്‍ പൂര്‍ത്തിയാക്കികഴിഞ്ഞു.

6,303 ശൗലായങ്ങളുടെ നിര്‍മാണ പ്രവര്‍ത്തികള്‍ നടന്നുവരുകയാണ്. 7945 ശൗചാലയങ്ങളുടെ പണി ഇതുവരെ ജില്ലിയല്‍ പൂര്‍ത്തിയായിട്ടുണ്ട്. 2600 ശൗചാലയങ്ങളാണ് നിലവിലെ കണക്ക് പ്രകാരം ജില്ലയില്‍ ദുര്‍ഘടമായ പ്രദേശത്ത് നിര്‍മ്മിക്കേണ്ടിവരുക.