ന്യൂദല്ഹി: ബിജെപി സംസ്ഥാന കമ്മറ്റി ഓഫീസിന് നേരെയുണ്ടായ അക്രമം സംസ്ഥാന പ്രസിഡണ്ട് കുമ്മനം രാജശേഖരനെ ലക്ഷ്യമിട്ടായിരുന്നുവെന്ന് സംശയിക്കുന്നതായി ബിജെപി നേതാവും കേന്ദ്രമന്ത്രിയുമായ നിര്മല സീതാരാമന്. അക്രമം നടക്കുന്നതിന് അരമണിക്കൂര് മുന്പ് വരെ കുമ്മനം ഓഫീസില് ഉണ്ടായിരുന്നു.
കുപ്രസിദ്ധമായ കണ്ണൂര് മോഡല് സംസ്ഥാനമൊട്ടാകെ വ്യാപിപ്പിക്കുകയാണ് സിപിഎം. തിരുവനന്തപുരത്ത് ബിജെപി ഓഫീസ് സിപിഎം ആക്രമിച്ച സംഭവത്തില് പ്രതികരിക്കുകയായിരുന്നു അവര്. സിപിഎം ജനറല് സെക്രട്ടറി സീതാറാം യച്ചൂരി കശ്മീരിന് പകരം കേരളത്തിലേക്കാണ് പോകേണ്ടത്. കശ്മീരിലെ വിഘടനവാദികളെയല്ല, കേരളത്തില് അക്രമമുണ്ടാക്കുന്ന സിപിഎം നേതാക്കളെയാണ് യച്ചൂരി കാണേണ്ടത്.
ഭരണത്തണലില് സിപിഎം അക്രമം നടത്തുന്ന കേരളത്തില് സമാധാനം പുലര്ത്താനാണ് യച്ചൂരി ശ്രമിക്കേണ്ടത്. സിപിഎമ്മിന്റെ അക്രമത്തിനെതിരെ ബിജെപി നേതാക്കള് രാഷ്ട്രപതിയെ സന്ദര്ശിച്ചിരുന്നു. ഇതിന് ശേഷവും അക്രമം തുടരുന്നത് ഞെട്ടിപ്പിക്കുന്നതാണ്. ഇടത് ഭരണത്തില് കേരളത്തില് അരാജകത്വം വര്ദ്ധിച്ചു. 100 ദിവസത്തെ ഭരണത്തില് ജനോപകാരപ്രദമായ ഒന്നും സര്ക്കാരിന് പറയാനില്ല. അക്രമം വര്ദ്ധിച്ചത് മാത്രമാണ് നേട്ടം.
സിപിഎം ഭരണത്തില് ബംഗാളിലും ഇത് തന്നെയായിരുന്നു സ്ഥിതി. ബിജെപി പ്രവര്ത്തകര്ക്കെതിരായ അക്രമങ്ങളില് സര്ക്കാര് നടപടിയെടുക്കുന്നില്ല. ബിജെപി പ്രവര്ത്തകരെ കള്ളക്കേസില് കുടുക്കുകയും ചെയ്യുന്നു. ക്ഷേത്രപരിസരത്തെ ശാഖ തടയാന് സിപിഎം സംസ്ഥാന സെക്രട്ടറി പ്രവര്ത്തരെ പ്രേരിപ്പിക്കുന്നു. ക്ഷേത്രവിശ്വാസമില്ലാത്ത കമ്യൂണിസ്റ്റുകാര്ക്ക് ക്ഷേത്രത്തില് എന്താണ് കാര്യമെന്നും അവര് ചോദിച്ചു.
