തലശ്ശേരി: അനുബന്ധ റോഡില്ലാത്തതിനാല് നിര്മ്മാണം പൂര്ത്തിയായി നാലു വര്ഷം കഴിഞ്ഞിട്ടും ഗതാഗതസജ്ജമാകാതെ കിടക്കുന്ന മേലൂര് പാറപ്രം കടവ് പാലത്തിന് ശാപമോക്ഷമാകുന്നു. പാലത്തിലേക്ക് എത്താനുള്ള റോഡിനായി സ്ഥലം വിട്ടുനല്കാന് പുഴയുടെ ഇരുഭാഗങ്ങളിലുമുള്ള വസ്തു ഉടമകള് പൂര്ണ്ണ സമ്മതം മൂളിയതോടെ ഇതേവരെ നോക്കുകുത്തികളെപ്പോലെ നിന്നിരുന്ന പാലം എത്രയും പെട്ടെന്ന് നാടിനായി തുറന്നു നല്കാനാവുമെന്ന പ്രതീക്ഷകള് മൊട്ടിട്ടുതുടങ്ങി. ധര്മ്മടം പഞ്ചായത്തിലെ മേലൂരിനെയും പിണറായിയിലെ പാറപ്രത്തെയും ബന്ധിപ്പിക്കാന് അഞ്ചരക്കണ്ടി പുഴക്ക് കുറുകെ പാലം വേണമെന്ന നാടിന്റെ മുറവിളിക്ക് പതിറ്റാണ്ടുകളുടെ പഴക്കമുണ്ട്. നേരത്തെ ഇവിടെ കടത്തുതോണിയായിരുന്നു ഉണ്ടായിരുന്നത്. തോണിക്കാരന് മരിച്ചതോടെ നാട്ടുകാര്ക്ക് മുന്നില് പുഴകടക്കല് ചോദ്യചിഹ്നമായി മാറി. ജില്ലാ പഞ്ചായത്ത് ഇടപെട്ട് നടപ്പാലം പണിതുനല്കിയതോടെ താല്ക്കാലിക ആശ്വാസമായെങ്കിലും വാഹനങ്ങള്ക്ക് കൂടി കടന്നുപോകാനാകുന്ന കോണ്ക്രീറ്റ് പാലമായിരുന്നു നാട്ടുകാരുടെ സ്വപ്നം. ഒടുവില് അതും അംഗീകരിക്കപ്പെട്ടു. 2010 ആഗസ്ത് 1 ന് അന്ന് മേലൂര്-പാറപ്രം കടവ് പാലത്തിനായി തറക്കല്ലിട്ടു. അതേമാസം തന്നെ നിര്മ്മാണപ്രവൃത്തികളും തുടങ്ങി. റിക്കാര്ഡ് വേഗത്തില് 2012 നവംബര് മാസം അവസാനിക്കുന്നതിനിടെ പാലം യാഥാര്ത്ഥ്യമായി. അനുബന്ധ റോഡിനായി ലഭ്യമായ സ്ഥലങ്ങളിലൊക്കെ മണ്ണിട്ടുയര്ത്തി. എന്നാല് മേലൂര് ഭാഗത്ത് മമ്മാക്കുന്ന് റോഡിലും പാറപ്രം ഭാഗത്ത് പള്ളിക്കാട് വരെയുള്ള ശേഷിച്ച സ്ഥലം നഷ്ടപരിഹാര പ്രശ്നത്തില് ഉടക്കിയ ഉടമകള് വിട്ടുനല്കാന് തയ്യാറാകാതിരുന്നതാണ് കഴിഞ്ഞ നാലു വര്ഷമായി മേലൂര്-പാറപ്രം കടവ് പാലത്തിലെത്താനുള്ള വെല്ലുവിളിയായത്.
മേലൂര്-പാറപ്രം കടവ് പാലത്തിന് ശാപമോക്ഷമാകുന്നു അനുബന്ധ റോഡ് ഒരുക്കാനുള്ള കര്മ്മസമിതിയുടെ ശ്രമങ്ങള് ലക്ഷ്യത്തിലേക്ക്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.