കൊയിലാണ്ടി: കൊയിലാണ്ടിയിലെ താല്ക്കാലിക ഫയര്സ്റ്റേഷന് കെട്ടിട നിര്മ്മാണ വിഷയത്തില് മുന്സിപ്പാലിറ്റിക്കെതിരെ സ്പോട്സ് കൗണ്സില് കോടതിയെ സമീപിച്ചു. സ്പോട്സ് കൗണ്സിലിന്റ അധീനതയിലുള്ള കൊയിലാണ്ടി സ്റ്റേഡിയത്തിന്റെ കിഴക്ക് ഭാഗത്തുള്ള രണ്ട് കടമുറികളാണ് ഇപ്പോള് ഫയര്സ്റ്റേഷന്റെ താല്കാലിക കെട്ടിടമാക്കി മാറ്റാന് ശ്രമം നടത്തുന്നത്. സ്പോട്സ് കൗണ്സിലിന്റെ അനുവാദമില്ലാതെയാണ് നഗരസഭാ അധികൃതര് പ്രവൃത്തി ആരംഭിച്ചത്. നിര്മ്മാണ പ്രവൃത്തി താല്ക്കാലികമായി നിര്ത്തിവെക്കണമെന്ന് ആവശ്യപ്പെട്ടാണ് സ്പോട്സ് കൗണ്സില് കൊയിലാണ്ടി കോടതിയെ സമീപിച്ചത്.
അടുത്ത മാസം ആദ്യവാരത്തോടു കൂടി അധികാരത്തില് വരുന്ന സ്പോട്സ് കൗണ്സില് കമ്മറ്റി പ്രവര്ത്തനം ആരംഭിക്കുന്നതു വരെ യാതൊരുവിധ പ്രവൃത്തിയും നടത്തരുതെന്നാണ് സ്പോട്സ് കൗണ്സിലിന്റെ വാദം. സ്ഥിരം നിര്മ്മാണങ്ങളൊന്നും ഇവിടെ നടത്തുന്നില്ലെന്ന് നഗരസഭ അധികൃതരും പറയുന്നു.
കൊയിലാണ്ടിയില് ഫയര്സ്റ്റേഷന് ആരംഭിക്കണമെന്ന് വര്ഷങ്ങളായി വിവിധ ഭാഗങ്ങളില് നിന്നും ആവശ്യം ഉയരുന്നുണ്ട്. എന്നാല് സ്ഥിരമായ കെട്ടിടമുണ്ടാക്കാനും അതിനു വേണ്ട സ്ഥലം കണ്ടെത്താനും നഗരസഭയ്ക്ക് ഇതുവരെ കഴിഞ്ഞിട്ടില്ല. മണമല് ഹോമിയോ ആശുപത്രിയ്ക്കടുത്ത് ഫയര്സ്റ്റേഷന് സ്ഥിരം സൗകര്യം ഒരുക്കാന് നഗരസഭ പ്രവര്ത്തനം നടത്തുമെന്ന് നഗരസഭ കോടതിയില് സമര്പ്പിച്ച സത്യവാങ്മൂലത്തില് പറയുന്നുണ്ട്. ഇത്തരം ഒരു സ്ഥലം ഉണ്ടെന്നിരിക്കെ സര്ക്കാര് അനുമതി ലഭിച്ചിട്ടും ഇത്രയും കാലം നിര്മ്മാണ പ്രവൃത്തി ആരംഭിക്കാത്തതില് ദുരൂഹതയുണ്ട്.
