മട്ടാഞ്ചേരി: കൊച്ചി അഴിമുഖത്തെ ആധുനിക സര്വ്വീസ് റോ റോ ജങ്കാര് സേവനത്തിന് വീണ്ടും കാത്തിരിക്കേണ്ടി വരും. ഫോര്ട്ടുകൊച്ചിയിലെ ജങ്കാര്ജെട്ടി നിര്മ്മാണം അനിശ്ചിതമായി നീളുന്നതും കരാറുകാര് ജെട്ടി നിര്മ്മാണമേഖലയില് നിന്ന് പിന്മാറുന്നതും അധികൃതര്ക്ക് തലവേദനയായിട്ടുണ്ട്. ഫോര്ട്ടുകൊച്ചി മേഖലയിലെ ജങ്കാര്ജെട്ടി നിര്മ്മാണംഇഴഞ്ഞു നീങ്ങുകയാണ്. ഒരു മീറ്റര് വ്യാസത്തില് 40 മീറ്ററിലേറെ താഴ്ചയില് ആറ് പില്ലര് പൈലിങ്ങ് നടത്തേണ്ട ജെട്ടിയില് രണ്ടെണ്ണം മാത്രമാണ് ഇതിനകം പൂര്ത്തിയായത്. എക്കല് അടിഞ്ഞത് മൂലം വേലിയേറ്റ ഇറക്കവേളയില് നിര്മ്മാണ ജോലിക്ക് തടസമുണ്ടാകുന്നതായി തൊഴിലാളികള് പറയുന്നു. വൈപ്പിന് മേഖലയിലെ ജങ്കാര്ജെട്ടി നിര്മ്മാണം ധൃതഗതിയില് മുന്നേറുകയുമാണ്.
ഫോര്ട്ടുകൊച്ചി-വൈപ്പിന് മേഖലയിലെ വാഹന കടത്ത് സുഗമമാക്കുന്ന ലക്ഷ്യവുമായാണ് റോ റോ ജങ്കാറിന് കൊച്ചി കോര്പ്പറേഷന് മുന്നിട്ടിറങ്ങിയത്. വര്ഷങ്ങള്ക്ക് മുമ്പ് നടന്ന സര്വ്വീസ് പ്രഖ്യാപനം ഈമാസം തുടങ്ങുമെന്നാണ് മുന് ഭരണകര്ത്താക്കള് പറഞ്ഞത്. ഇതിനായി ഷിപ്പിയാര്ഡില് ജങ്കാര് നിര്മ്മാണം പുരോഗമിക്കുന്നുമുണ്ട്. എന്നാല് ജങ്കാര്ജെട്ടി നിര്മ്മാണം നീണ്ടുപോകുന്നത് റോ റോ സര്വ്വീസ് തുടങ്ങുന്നതിന് കാലതാമസമുണ്ടാക്കുമെന്നും പറയുന്നു.
