ആലപ്പുഴ: കേന്ദ്ര തൊഴിലാളി സംഘടനകള് ഉന്നയിച്ച ആവശ്യങ്ങളില് അവിദഗ്ദ്ധ കാര്ഷികേതര തൊഴിലാളികളുടെ കുറഞ്ഞ ദിവസവേതനം 246 രൂപയില് നിന്നും 350 രൂപയായി ഉയര്ത്തുകയും ബോണസ് പരിധി 10,000 രൂപയില് നിന്നും 21,000 രൂപയാക്കി ഉയര്ത്തുകയും ചെയ്ത കേന്ദ്ര സര്ക്കാര് നടപടിയെ ബിഎംഎസ് ജില്ലാ കമ്മറ്റി അഭിനന്ദിച്ചു. കേന്ദ്ര ജീവനക്കാരുടെ മുടങ്ങിക്കിടക്കുന്ന ബോണസ്സ് ഉടന് നല്കാനുള്ള തീരുമാനവും കരാര് തൊഴിലാളികള്ക്ക് രജിസ്ട്രേഷന് നടപ്പാക്കാനും ഇവര്ക്കു കുറഞ്ഞ വേതനം ഉറപ്പാക്കാന് വിജ്ഞാപനം ഇറക്കാനും വീഴ്ച വരുത്തുന്ന കരാറുകാര്ക്കെതിരെ നടപടി എടുക്കാനുള്ള തീരുമാനവും അങ്കണവാടികളെ സാമൂഹ്യ സുരക്ഷാ പദ്ധതിയില് ഉള്പ്പെടുത്തുകയും ആരോഗ്യ, മാനവവിഭവശേഷി, തൊഴില്, വനിതാ ശിശുക്ഷേമ മന്ത്രാലയങ്ങളുടെ സമിതി പരിശോധിക്കണമെന്നുള്ള തീരുമനവും ട്രേഡുയൂണിയന് രജിസ്ട്രേഷന് 45 ദിവസത്തിനുള്ളില് പൂര്ത്തിയാക്കാനുള്ള തീരുമാനവും തൊഴില് നിയമങ്ങളില് മാറ്റം വരുത്തുന്നത് തൊഴിലാളി സംഘടനകളുമായി ചര്ച്ച ചെയ്തശേഷം എന്ന തീരുമാനവും സ്വാഗതാര്ഹമാണ്.
ഈ സാഹചര്യത്തില് നാളെ നടക്കുന്ന ദേശീയ പണിമുടക്കില് ബിഎംഎസ് പങ്കെടുക്കില്ല. തൊഴിലാളികള്ക്ക് പണിയെടുക്കാനുള്ള സംരക്ഷണവും സാഹചര്യവും ഒരുക്കുന്ന പക്ഷം തൊഴിലാളികള് തൊഴില് ചെയ്യാന് തയ്യാറാണെന്നും യോഗം തീരുമാനിച്ചു. ജില്ലാ പ്രസിഡന്റ് ബി. രാജശേഖരന് അദ്ധ്യക്ഷത വഹിച്ചു. സംസ്ഥാന വൈസ് പ്രസിഡന്റ് ബി. ശിവജി സുദര്ശന് ഉദ്ഘാടനം ചെയ്തു. ജില്ലാ സെക്രട്ടറി സി. ജി. ഗോപകുമാര്, ജില്ലാ ട്രഷറര് ബിനീഷ് ബോയി എന്നിവര് സംസാരിച്ചു.
