ചിദാനന്ദപുരിക്കെതിരായ ജയരാജന്റെ പ്രസ്താവന ദുരുദ്ദേശപരം: ഭാരതീയ വിചാരകേന്ദ്രം

കണ്ണൂര്‍: ഭാരതീയ ദര്‍ശങ്ങളെക്കുറിച്ച് ആഴത്തില്‍ പഠിക്കുകയും ധര്‍മ്മപ്രബോധനങ്ങളിലൂടെ ലക്ഷക്കണക്കിന് ഹൈന്ദവര്‍ക്ക് ശരിയായ ജീവിതദിശ കാട്ടിക്കൊടുക്കുകയും ചെയ്യുന്ന പൂജനീയ സ്വാമി ചിദാനന്ദപുരിക്കെതിരെ സിപിഎം നേതാവ് പി.ജയരാജന്‍ നടത്തിയ പ്രസ്താവന ദുരുദ്ദേശപരവും ജനങ്ങളെ തെറ്റിദ്ദരിപ്പിക്കുന്നതുമാണെന്ന് ഭാരതീയ വിചാരകേന്ദ്രം ജില്ലാസമിതി പത്രക്കുറിപ്പില്‍ പറഞ്ഞു. സര്‍വ്വ മതങ്ങളെയും സമന്വയബുദ്ധ്യാ കാണുകയും ബഹുമാനിക്കുകയും ചെയ്യുന്ന സ്വാമിജി താത്വികമായ കാഴ്ചപ്പാടുകള്‍ കാര്യമാത്രപ്രസക്തമായ രീതികളില്‍ മാത്രം അവതരിപ്പിക്കുന്ന സന്യാസിയാണ്. ഭാരതീയ ഋഷിപരമ്പരയില്‍പ്പെട്ട പൂജനീയ സ്വാമിജിയെ ദുഷിച്ച രാഷ്‌ട്രീയത്തിന്റെ അളവുകോല്‍ വെച്ച് അളക്കാന്‍ ശ്രമിക്കുന്നത് ജയരാജന്റെ മൗഢ്യവും അജ്ഞതയുമാണ്. തെരുവു ഘോഷയാത്രകളൊരുക്കി നാരായണഗുരുവിനെയും തൃച്ചംബരം പെരുമാളിനെയും അധിക്ഷേപിച്ചതിലുള്ള ജാള്യത മറച്ചുവെക്കാന്‍ പാടുപെടുന്നതിനിടയിലാണ് പരമ പൂജനീയ ചിദാനന്ദസ്വാമികളെപ്പോലുള്ള ഹൈന്ദവാചാര്യന്‍മാരുടെ നേരെ സിപിഎം നേതൃത്വം വാളോങ്ങുന്നത്. ഇത് ഹൈന്ദവവിരുദ്ധവും പാര്‍ട്ടി നേതൃത്വം ഹൈന്ദവ സമൂഹത്തോട് കാണിക്കുന്ന അസഹിഷ്ണുതയുമാണ്. ജയരാജന്റെ വ്യക്തിപരമായ നിലപാടാണോ സിപിഎം സംഘടനാ നിലപാടാണോ ഇതെന്ന് വ്യക്തമാക്കണമെന്നും സമിതി ആവശ്യപ്പെട്ടു.