വെഞ്ഞാറമൂട്: കൃഷി ചെയ്തിട്ട് കാര്യമില്ല. അത് കൊണ്ട് ഇത്തവണ ഞങ്ങള്‍ക്ക് ഇവിടെ ഓണകൃഷിയില്ല. ഇതു പുല്ലമ്പാറയിലെ പാരമ്പരാഗത കര്‍ഷകരുടെ വാക്കുകളാണ്. പുല്ലമ്പാറ പഞ്ചായത്തിലെ കുഞ്ചായിരവല്ലി കുന്നിലെ പാറ ഖനനത്തെ തുടര്‍ന്നാണ് അടിവാരത്തെ കൃഷി ഉപേക്ഷിക്കാന്‍ കര്‍ഷകര്‍ തീരുമാനിച്ചത്.
പുല്ലമ്പാറ ഗ്രാമപഞ്ചായത്തിലെ 75 ഏക്കറോളം വരുന്ന പാടശേഖരം ഈ പാറയുടെ അടിഭാഗത്തായാണ്. ജില്ലയിലെ ചുരുക്കം ചില പാടശേഖരങ്ങളില്‍ പ്രധാന പാടശേഖരമാണിത്. കഴിഞ്ഞ മഴയില്‍ ക്വറിയില്‍ നിന്നും മഴ വെള്ളത്തോടൊപ്പം പൊട്ടി ഒഴുകിയ മണ്ണ് പാട ശേഖരത്തില്‍ വന്നടിഞ്ഞു ഇവിടുത്തെ കൃഷി നാശമായിരുന്നു. അതോടൊപ്പം ജലസ്‌ത്രോതസുകളും അപകടത്തിലായിരുന്നു.
എല്ലാ വര്‍ഷവും ഓണക്കാലത്ത് നെല്‍കൃഷിയും ഒപ്പം മറ്റു പച്ചകറി കൃഷികളും ഇവിടെ നടത്തിയിരുന്നു. പ്രദേശത്ത് ക്വാറി മാഫിയ സജീവമായതോടെ ഇവിടുത്തെ ജനങ്ങളുടെ ജീവനും സ്വത്തിനും ഭീഷണി ഉയര്‍ത്തിയിരിക്കുകയാണ്. പുല്ലമ്പാറ ഗ്രാമപഞ്ചായത്തില്‍ മുത്തിപ്പാറ വാര്‍ഡിലാണ് ക്വാറി. പാറ തുരന്നും പൊട്ടിച്ചും വലിയ മല തുടച്ചു നീക്കുന്നത്. കുഞ്ചായിരവല്ലി കുന്നില്‍ പ്രവര്‍ത്തിക്കുന്ന ക്വറിയില്‍ പാറ പൊട്ടിക്കുമ്പോള്‍ താഴ് വാരങ്ങളില്‍ താമസിക്കുന്നവരുടെ ഉള്ള് പിടയുന്ന അവസ്ഥയാണ്. ഒപ്പം വീടുകളും.
പ്രദേശത്തെ പല വീടുകളിലെ ഭിത്തികളിലും വിള്ളല്‍ രൂപപ്പെട്ടു. പലയിടത്തും ചുവരുകള്‍ അടര്‍ന്നു വീണ അവസ്ഥയിലാണ്. അടിവാരത്തെ പുല്ലമ്പാറ അംഗന്‍വാടി കെട്ടിടത്തിന്റെ ചുറ്റുമതില്‍ നിരവധി ഇടങ്ങളില്‍ പൊട്ടി മാറിയ അവസ്ഥയിലാണ്. അധ്യാപകരും വിദ്യാര്‍ത്ഥികളുമൊക്കെ ഭീതിയിലാണ്. പാറ തുരന്നു വെടി മരുന്ന് നിറച്ചു പൊട്ടിക്കുമ്പോള്‍ ഇവിടുത്തുകാരുടെ നെഞ്ചിലാണ് വെടി പൊട്ടുന്നത്. പുലര്‍ച്ചെ ആരംഭിക്കുന്ന പാറ പൊട്ടിക്കല്‍ അര്‍ത്ഥ രാത്രിയിലാണ് അവസാനിക്കുന്നത്. ദിവസേന 250 ഓളം ടോറസ് ലോറിയില്‍ ലോഡ് പോകുന്നുണ്ടെന്നും നാട്ടുകാര്‍ പറയുന്നു. ആയിരവില്ലി കുടുംബ ക്ഷേത്രം, പാലം ജുമാ മസ്ജിദ് തുടങ്ങി ആരാധനാലയങ്ങളും ഭീഷണിയിലാണ്.
പാറ ഖനനത്തിനെതിരെ നിരവധി പരാതികളാണ് ഉയര്‍ന്നിട്ടുള്ളത്. നിരവധി വകുപ്പ് തലങ്ങളില്‍ പരാതികള്‍ കൊടുത്ത് കാത്തിരിക്കുകയാണ് പാടശേഖര സമിതിയും നാട്ടുകാരും.
ജന്മഭൂമി ഓണ്‍ലൈന്‍