തിരുവനന്തപുരം: ബെല്‍ജിയന്‍ മെലിനോയിസ് വേട്ടനായ്‌ക്കള്‍ കടിച്ചുകീറിയതിന്റെ കഠിന വേദനയും കടിച്ചമര്‍ത്തി അന്നാമരിയ പൊരുതി നേടിയ മികച്ച വിജയത്തിന് ജന്മഭൂമിയുടെ ആദരം. മികച്ച വിജയം നേടിയ വിദ്യാര്‍ത്ഥികള്‍ക്കായി ജന്മഭൂമി ഏര്‍പ്പെടുത്തിയ മികവ് 2026 പുരസ്‌കാരം പോങ്ങുംമൂട് മേരിനിലയം സീനിയര്‍ സെക്കന്‍ഡറി സ്‌കൂളിലെ അന്നാമരിയ വി.മനോജ് ഏറ്റുവാങ്ങി.
ജനുവരി ഏഴിന് ഉച്ചയോടെ സഹപാഠികളായ കൂട്ടുകാരികളുമായി റോഡിലൂടെ നടക്കുന്നതിനിടയില്‍ മണ്‍വിളക്കുസമീപം വച്ചാണ് അന്നാമരിയയെ സമീപത്തെ വീട്ടില്‍ വളര്‍ത്തിയ വേട്ടനായ്‌ക്കള്‍ അക്രമിച്ചത്. ഒരുനായ കാലില്‍ കടിച്ചുകീറി നിലത്തേക്കിട്ടപ്പോള്‍ രണ്ടാമത്തെ നായ കഴുത്തില്‍ കടിക്കാന്‍ ശ്രമിച്ചു. ഏറെ പണിപ്പെട്ടാണ് കഴുത്തില്‍ കടിയേല്‍ക്കാതെ രക്ഷപ്പെട്ടത്. അപ്പോഴേക്കും കാലിലെ മാംസം നായ കടിച്ചെടുത്തു. നടുവിനും മാരകമായി കടിയേറ്റു. അന്നമിരയുടെയും കൂട്ടുകാരികളുടെയും നിലവിളികേട്ട് ഓടിയെത്തിയ നാട്ടുകാര്‍ വടികൊണ്ടും മറ്റും അടിച്ചാണ് നായയെ ഓടിച്ചത്. തുടര്‍ന്ന് അന്നമരിയയെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
പ്ലസ്ടു പരീക്ഷയ്‌ക്കുള്ള പഠന സമയം മുഴുവന്‍ വേദന സഹിക്കുകയായിരുന്നു അന്നമരിയ. വേദനയും ചികിത്സയുടെ സമ്മര്‍ദ്ദവും കരുത്താക്കി മാറ്റിയ അന്നമരിയ സിബിഎസ്ഇ സയന്‍സ് പരീക്ഷയില്‍ 85 ശതമാനം മാര്‍ക്കും നേടി. നായകളെ സുരക്ഷിതമല്ലാതെ വളര്‍ത്തിയ കബീര്‍ എന്ന ആളുടെ പേരില്‍ അന്നമരിയയുടെ അച്ഛന്‍ മനോജും ബന്ധുക്കളും ശ്രീകാര്യം പോലീസില്‍ പരാതിനല്‍കിയെങ്കിലും ഫലം കണ്ടിട്ടില്ല. ഇന്നലെ അച്ഛന്‍ മനോജിനും അനുജന്‍ ആരോണിനുമൊപ്പം തിരുവന്തപുരം ബ്യൂറോയിലെത്തിയ അന്നമരിയക്ക് ഡെസ്‌ക് ചീഫ് ആര്‍.പ്രദീപ് മികവ് പുരസ്‌കാരം സമ്മാനിച്ചു. ബ്യൂറോ ചീഫ് അജി ബുധന്നൂരും സന്നിഹിതനായിരുന്നു.
