ടെണ്ടര് ഒഴിവാക്കിയും പ്രവര്ത്തികള് നല്കുന്നത് വ്യാപകമാവുന്നു
കണ്ണൂര്: സംസ്ഥാനത്ത് ഫണ്ട് വകയിരുത്താതെയും ടെണ്ടര് ഒഴിവാക്കിയും സര്ക്കാര് പ്രവര്ത്തികള് നല്കുന്നത് വ്യാപകമാവുന്നു. പിന്നില് കാലാകലങ്ങളായി സംസ്ഥാന ഭരണം കയ്യാളുന്ന ഇടത്-വലത് രാഷ്ട്രീയക്കാരുടെ കുത്തകകളുമായുളള ഒത്തുകളിയെന്ന് ആരോപണം. സംസ്ഥാനത്ത് കഴിഞ്ഞ ദിവസം പൊതുവമരാമത്ത് വകുപ്പ് നിര്ത്തിവെയ്ക്കാന് ഉത്തരവിട്ട പ്രവര്ത്തികള് ഉള്പ്പെടെ ഇത്തരത്തില് ഫണ്ട് വകയിരുത്താതെയും ടെണ്ടര് ഒഴിവാക്കിയും നടത്തി വരുന്ന പ്രവര്ത്തികളാണ്. നിര്മാണപ്രവൃത്തി നല്കുന്നത് സുതാര്യ ടെണ്ടറിലൂടെയായിരിക്കണമെന്ന കേന്ദ്ര-വിജിലന്സ് കമ്മീഷനും സുപ്രീം കോടതിയും നല്കിയിട്ടുള്ള നിര്ദ്ദേശത്തിന് വിരുദ്ധമായി പ്രവര്ത്തിക്കാനുള്ള ഇത്തരം പ്രവണത വര്ദ്ധിച്ചുവരികയാണ്.
പൊതുപണം ഉപയോഗിച്ച് നടത്തപ്പെടുന്ന എല്ലാ നിര്മാണപ്രവര്ത്തികളും സുതാര്യ ടെണ്ടറിലൂടെ മാത്രം ഏജന്സികളെ ഏല്പ്പിക്കുവാന് സംസ്ഥാന സര്ക്കാര് ഭരണഘടനാപരമായി ബാദ്ധ്യസ്ഥരാണ്. എന്നാല് ഭരണ-പ്രതിപക്ഷ എംഎല്എമാരുടെ ഓരോ തരത്തിലും ശൈലിയിലുമുള്ള ശുപാര്ശ കത്തുകള് വാങ്ങി ഏതെങ്കിലും ഏജന്സികള്ക്ക് പ്രവൃത്തികള് ഏല്പ്പിച്ച് കൊടുക്കുകയാണ്.
കണ്ണൂര് ജില്ലയിലെ മലയോരഹൈവെ, അമ്പലപ്പുഴ-തിരുവല്ല റോഡ് ഉള്പ്പെടെയുളളവയുടെ നിര്മാണ പ്രവൃത്തി ഏറ്റെടുത്ത ഊരാളുങ്കല് തൊഴിലാളി സംഘത്തിന് 977.7 കോടി രൂപയുടെ നാലു പ്രവൃത്തികളാണ് ടെണ്ടറില്ലാതെ നല്കിയത്. ടെണ്ടറില്ലാതെ ഊരാളുങ്കല് ഏജന്സിക്ക് ഒരേ സമയം കൈവശം വെക്കാവുന്ന പ്രവൃത്തികളുടെ ആക അടങ്കല് 250 കോടിയാണ്. ഇതുമായി ബന്ധപ്പെട്ട് അസോസിയേഷന് നല്കിയ ഹരജി ഇപ്പോഴും പരിഗണനയിലാണ്. പ്രവൃത്തി ഇതിനോടകം ചെയ്ത് കഴിഞ്ഞില്ലെങ്കില് തല് സ്ഥിതി തുടരണമെന്നാണ് മാര്ച്ച് 23 ലെ ഇടക്കാല ഉത്തരവ്. ഇത് രണ്ട് മാസത്തേക്കും പിന്നീട് ഹരജിയില് തീര്പ്പ് കല്പ്പിക്കുന്നത് വരെയും നീട്ടിയിട്ടുണ്ട്. നിലവില് കോടതി ഉത്തരവ് ലംഘിച്ച് ഊരാളുങ്കല് സൊസൈറ്റി പണികള് തുടരുകയാണ്. ഇതിന്റെ ഉത്തരവാദിത്വം ബന്ധപ്പെട്ട ഉദ്യോഗസ്ഥന്മാര്ക്കും സൊസൈറ്റിക്കും മാത്രമാണ്. കമ്മീഷനെ നിയമിച്ച് ഉത്തരവ് ലംഘനം ബോധ്യപ്പെടുത്താനും കോടതി അലക്ഷ്യനടപടികള് സ്വീകരിപ്പിക്കുന്നതിനും വീണ്ടും ഹരജി സമര്പ്പിക്കുന്നതാണെന്നും ഫണ്ട് വകയിരുത്താതെയും സുതാര്യ ടെണ്ടര് അട്ടിമറിച്ചും സംസ്ഥാനത്ത് ഒരു നിര്മാണ പ്രവൃത്തിയും നല്കരുതെന്നും കേരള ഗവ. കോണ്ട്രാക്ടേഴ്സ് അസോസിയേഷന് സംസ്ഥാന പ്രസിഡന്റ് വര്ഗീസ് കണ്ണമ്പള്ളി, ജില്ലാ ഭാരവാഹികളായ സി.രാജന്, സി.പി.ദിവാകരന്, കെ.കെ.സുരേഷ്ബാബു, കെ.എം.അജയകുമാര് എന്നിവര് വാര്ത്താസമ്മേളനത്തില് പറഞ്ഞു.
