കോഴിക്കോട്: കോഴിക്കോട് കോര്പ്പറേഷന് കുടുംബശ്രീ ഓണാഘോഷത്തോടനുബന്ധിച്ച് സപ്തംബര് 30 ന് രാവിലെ 9 മുതല് കോഴിക്കോട് മലബാര്ക്രിസ്ത്യന് കോളജ് ഗ്രൗണ്ടില് സംഘടിപ്പിക്കുന്ന സ്നേഹപാലിക 2016 ഓണപ്പൂക്കള മത്സരത്തിന്റെ ലോഗോ പ്രകാശനം ചെയ്തു. സംസ്ഥാന സ്പോര്ട്സ് കൗണ്സില് പ്രസിഡന്റ് ടി.പി. ദാസന് പ്രസ്സ് ക്ലബ് പ്രസിഡന്റ് കമാല് വരദൂറിന് നല്കി പ്രകാശനം നിര്വ്വഹിച്ചു. ചടങ്ങില് കോര്പ്പറേഷന് ഡെപ്യൂട്ടി മേയര് മീരാദര്ശക് അദ്ധ്യക്ഷത വഹിച്ചു. വിദ്യാഭ്യാസ കായികം കാര്യ സ്റ്റാന്റിംഗ് കമ്മിറ്റി ചെയര്മാന് എം. രാധാകൃഷ്ണന്, കൗണ്സിലര് പി. കിഷന് ചന്ദ്, കോ-ഓര്ഡിനേറ്റര് ആര്. ജയന്ത്കുമാര്, സിഡിഎസ് ചെയര്പേഴ്സണ്മാരായ പ്രമീള ദേവദാസ്, കെ.ബീന, എ.ടി.അബ്ദുള്ളകോയ എന്നിവര് സംസാരിച്ചു.
ജനറല് കണ്വീനര് എം.വി. റംസി ഇസ്മായില് സ്വാഗതവും പി.പി. ഷീജ നന്ദിയും പറഞ്ഞു. നാട്ടില് കൂട്ടായ്മയുടെ ചരിത്രപ്പൂക്കളം എന്ന ലക്ഷ്യവുമായി കോഴിക്കോട് കോര്പ്പറേഷന് കുടുംബശ്രീയ്ക്ക് കീഴിലെ 2000 ല് പരം അയല്ക്കൂട്ടങ്ങളും 10,000 ല് പരം മത്സരാര്ത്ഥികളും ഒന്നിച്ചണിനിരന്ന് ഒരുക്കുന്ന പൂക്കളങ്ങള് രാജ്യത്തെ ഏറ്റവും വലിയ പൂക്കളമായി മാറും.
ഓരോ അയല്ക്കൂട്ടങ്ങളിലെയും അഞ്ചു വീതം അംഗങ്ങള് ചേര്ന്നാണ് ഓരോ പൂക്കളങ്ങളും ഒരുക്കുക. ഒന്നും രണ്ടും മൂന്നും സ്ഥാനം നേടുന്ന വിജയികള്ക്ക് സ്വര്ണ്ണ മെഡലും മറ്റു പ്രോത്സാഹന സമ്മാനങ്ങളും നല്കും. മത്സരത്തില് പങ്കെടുക്കുവാന് ആഗ്രഹിക്കുന്നവര് വാര്ഡ് എഡിഎസ് മുഖാന്തിരമാണ് രജിസ്റ്റര് ചെയ്യേണ്ടത്. രജിസ്ട്രേഷന് സപ്തംബര് മൂന്നിന് അവസാനിക്കും. വിശദവിവരങ്ങള്ക്ക് കോര്പ്പറേഷന് കുടുംബശ്രീ ഓഫീസുമായി ബന്ധപ്പെടുക.
