മംഗലപുരം: പോലീസിനെ മര്ദ്ദിച്ച് റോഡിലൂടെ നടത്തിയ സിപിഎമ്മുകാരനായ പ്രതിയെ പിടികൂടിയ എസ്ഐ തെറിച്ചു. മുരുക്കുംപുഴയ്ക്ക് സമീപം കരിച്ചാറയില് മദ്യലഹരിയിലും കഞ്ചാവ് ലഹരിയിലും അടിമപ്പെട്ട് റോഡില് ബഹളം ഉണ്ടാക്കിയ സംഘത്തെ പിടികൂടുവാനെത്തിയ മംഗലപുരം സ്റ്റേഷനിലെ എസ്ഐ യെയും പോലീസുകാരെയും ആക്രമിക്കുകയും പോലീസ് ജീപ്പ് കേട് വരുത്തുകയും ചെയ്ത ശേഷം പോലീസുകാരെ റോഡിലൂടെ നടത്തിപ്പിച്ച കേസിലെ പ്രതികളിലൊരാളെ പിടികൂടിയതിന്റെ പ്രതികാരമായാണ് മംഗലപുരം എസ്ഐ പ്രശാന്തിനെ മാറ്റിയത്.
കേസിലെ ഒമ്പതാം പ്രതിയായ സിപിഎം പ്രവര്ത്തകനെ അറസ്റ്റ് ചെയ്ത് ദിവസങ്ങള്ക്കുള്ളിലാണ് എസ്ഐയെ സ്ഥലം മാറ്റിയത്. പ്രതിയെ പിടികൂടിയ ഉടന്തന്നെ സിപിഎം നേതാവും ജില്ലാ പഞ്ചായത്ത് മെമ്പറുമായ ജലീലിന്റെ നേതൃത്വത്തില് പോലീസ് സ്റ്റേഷന് ഉപരോധവും നടന്നിരുന്നു. ഉപരോധത്തെത്തുടര്ന്ന് മണിക്കൂറുകളോളം എസ്ഐയെയും പോലീസുകാരെയും പോലീസ് സ്റ്റേഷനിനുള്ളില് കയറ്റാതെയായിരുന്നു പ്രതിഷേധം. അറസ്റ്റിലായ കേസിലെ ഒമ്പതാംപ്രതിയെ ഉടന് വിട്ടയിച്ചില്ലെങ്കില് എസ്ഐയും പോലീസുകാരും ഇവിടെ ഇരിക്കില്ലെന്ന് പ്രതിഷേധക്കാര് വെല്ലുവിളിച്ചിരുന്നുവെങ്കിലും ഇത് വകവയ്ക്കാതെ പ്രതിയ്ക്കെതിരെ നിയമനടപടി എടുത്തതിന്റെ വൈരാഗ്യത്തിലാണ് എസ്ഐയെ മാറ്റിയത്. പോലീസിനെ ആക്രമിക്കുന്നതിന്റെ മൊബൈല് ദൃശ്യങ്ങള്ടക്കമുള്ളവയുടെ അടിസ്ഥാനത്തിലാണ് പ്രതിയെ തിരിച്ചറിഞ്ഞത്. പ്രതികളില് നാലുപേര് ഒന്നിച്ചു നില്ക്കുമ്പോഴായിരുന്നു എസ്ഐ ഇവരെ പിടികൂടാന് എത്തിയതെങ്കിലും മറ്റു മൂന്ന്പേരും പാര്ട്ടി ഓഫീസില് കയറി രക്ഷപ്പെടുകയായിരുന്നു. കഞ്ചാവു മാഫിയകള്ക്കെതിരെ ശക്തമായ നടപടി എടുത്തിരുന്ന എസ്ഐയെ സ്ഥലം മാറ്റിയതോടുകൂടി പ്രദേശം കഞ്ചാവ് മാഫിയകളുടെ താവളമായിരിക്കുകയാണ്.
