കേരളത്തിന്റെ വികസനത്തിന് രാജ്യതലസ്ഥാനത്ത് ഒരു ദിനപ്പത്രം സംഘടിപ്പിച്ച ഏറ്റവും വലിയ പരിപാടി – ജന്മഭൂമി കോണ്ക്ലേവ് ‘തിങ്ക് ഇന്ഫ്ര’ ഒറ്റ വാചകത്തില് ഇങ്ങനെ വിലയിരുത്താം റോമന് കത്തോലിക്കാ സഭയെ സംബന്ധിച്ചിടത്തോളം കോണ്ക്ലേവ് എന്നത് പുതിയ പോപ്പിനെ തെരഞ്ഞെടുക്കാനുള്ള കര്ദ്ദിനാള്മാരുടെ യോഗമാണ് ലോകമെങ്ങുമുള്ള ക്രൈസ്തവ സമൂഹത്തെ നയിക്കേണ്ട ആത്മീയ ഗുരുവിനെയാണ് കോണ്ക്ലേവിലൂടെ തെരഞ്ഞെടുക്കുന്നത് കേരളത്തെ മുന്നോട്ട് നയിക്കേണ്ട ആശയം ഉരുത്തിരിച്ചെടുക്കുകയായിരുന്നു ദല്ഹിയില് നടന്ന ജന്മഭൂമി കോണ്ക്ലേവ് വിഷയവിദഗ്ധരും അതിസമ്പന്നമായ സദസ്സും ഒത്തൊരുമിച്ചപ്പോള് ഭാവികേരളത്തിന്റെ വികസന ചിത്രം തെളിഞ്ഞു.
ഡോ.സി.വി. ആനന്ദബോസ് ചൂണ്ടിക്കാട്ടിയതുപോലെ, വളര്ച്ചയുടെ പ്രധാനപ്പെട്ട നാല് ഘടകങ്ങളാണ് ജന്മഭൂമി അവതരിപ്പിച്ചത് – ഗതാഗതസംവിധാനം, ഐടി, ഗ്രാമീണഭാരതം, ടൂറിസം. ഇതിനുപുറമെ ‘കേരളത്തിന്റെ കുതിച്ചുചാട്ടം’ എന്ന വിഷയവും ചര്ച്ചയായി മൂന്ന് കേന്ദ്രമന്ത്രിമാര്ക്ക് പുറമെ മുതിര്ന്ന ഉദ്യോഗസ്ഥരും വിദഗ്ധരും പങ്കെടുത്ത കോണ്ക്ലേവില് നവകേരളത്തിനുള്ള ആശയങ്ങള് ഇതള്വിരിഞ്ഞു ജനപങ്കാളിത്തത്തോടെയുള്ള വികസനമാണ് കേരളത്തിനാവശ്യമെന്ന് കോണ്ക്ലേവ് പ്രഖ്യാപിച്ചു.
സാധ്യതകള് ഉപയോഗപ്പെടുത്താത്ത കേരളം – എന്തുകൊണ്ട് കേരളം പിന്നോട്ടോടുന്നുവെന്ന ചോദ്യത്തിന് കോണ്ക്ലേവ് നല്കിയ ഉത്തരമിതാണ് ആശയങ്ങളുണ്ട്, എന്നാല് നടപ്പിലാക്കാന് ഇഛാശക്തിയുള്ള ഭരണനേതൃത്വം കേരളത്തിനുണ്ടായിട്ടില്ല പ്രകൃതിവാതക പൈപ്പ്ലൈന് ഇപ്പോഴും എങ്ങുമെത്താത്തത് ഇതിന്റെ സാക്ഷ്യപത്രം മെട്രോമാന് ഇ. ശ്രീധരനെ ലഭിച്ചിട്ടും കൊച്ചി മെട്രോ പാതിവഴിയില് മുടന്തുന്നത് മറ്റൊരുദാഹരണം വര്ഷങ്ങള്ക്കുശേഷം ഒരു പദ്ധതി യാഥാര്ത്ഥ്യമാകുമ്പോള് ഉദ്ദേശിച്ച ഫലം ഉണ്ടാകുമോയെന്ന ചോദ്യവും കോണ്ക്ലേവ് ഉയര്ത്തി.
സമൂഹത്തിന് ഗുണകരമാകുന്ന പദ്ധതികള് ഏതാനുംപേര് വിചാരിച്ചാല് കേരളത്തില് അട്ടിമറിക്കാനാകുമെന്ന ആശങ്കയും പങ്കുവെക്കപ്പെട്ടു ജനങ്ങളുടെ അഭിപ്രായം തേടിയ ശേഷമാകണം പദ്ധതികള് പ്രഖ്യാപിക്കേണ്ടതെന്നായിരുന്നു സ്വീകാര്യമായ നിലപാട് പദ്ധതികള് പ്രഖ്യാപിച്ചതിനുശേഷം ജനങ്ങളുടെ അഭിപ്രായം തേടുന്ന നിലവിലെ സമീപനം പദ്ധതികള് വൈകുന്നതിന് കാരണമാകുന്നു.
ആധുനികസാങ്കേതിക വിദ്യയുടെ യുഗത്തില് ഒരാള് പോലും വികസനത്തില്നിന്നും പുറന്തള്ളപ്പെടുന്നില്ലെന്ന് ഉറപ്പാക്കണമെന്ന് ആവശ്യമുയര്ന്നു ഗ്രാമീണ ഭാരതത്തിന്റെ വികസനം സാധ്യമാകണമെങ്കില് ഇന്റര്നെറ്റ് സൗകര്യം ഓരോ ഗ്രാമത്തിലുമെത്തണം ഇപ്പോള് അപേക്ഷ ഓണ്ലൈനായി നല്കാമെങ്കിലും തുടര്നടപടികള്ക്ക് ഓഫീസില് ഹാജരാകേണ്ടി വരുന്നു ഇത് എന്ത് പരിവര്ത്തനമാണ് ജനങ്ങളുടെ ജീവിതത്തില് ഉണ്ടാക്കുന്നതെന്നായിരുന്നു പ്രസക്തമായ ചോദ്യം.
സാധ്യതകള് ഏറെയുള്ള ടൂറിസം മേഖല നേരിടുന്ന അവഗണന കോണ്ക്ലേവില് തുറന്നുകാട്ടപ്പെട്ടു ആയുര്വ്വേദത്തിന്റെ നാടാണ് കേരളം എന്നാല് ആയുര്വ്വേദത്തിന് ടൂറിസ്റ്റുകള് മറ്റ് സംസ്ഥാനങ്ങളെയാണ് ആശ്രയിക്കുന്നത് കേരളത്തനിമ നിലനിര്ത്തിയുള്ള പദ്ധതികളാണ് വേണ്ടതെന്നും നിര്ദ്ദേശമുയര്ന്നു.
ദുരന്തമുണ്ടായതിനുശേഷമുള്ള സഹായമല്ല, ദുരന്തം തടയാനുള്ള കര്മപദ്ധതികളാണ് കര്ഷകരെ സഹായിക്കുകയെന്ന് കോണ്ക്ലേവ് വ്യക്തമാക്കി എല്ലാറ്റിനുമുപരി രാഷ്ട്രീയ-ഭരണതലങ്ങളിലെ നേതൃരാഹിത്യത്തിന് കേരളം പരിഹാരം കാണണമെന്നും ആവശ്യമുയര്ന്നു.
