തിരുവനന്തപുരം: ലീഗല് മെട്രോളജി വകുപ്പ് തിരുവനന്തപുരം ജില്ലയിലെ വസ്ത്ര വ്യാപാരസ്ഥാപനങ്ങളിലും ഹോം അപ്ലയന്സസ് വ്യാപാരസ്ഥാപനങ്ങളിലും പരിശോധന നടത്തി. പായ്ക്കു ചെയ്ത ഉത്പന്നങ്ങളുടെ പായ്ക്കറ്റില് നിയമാനുസരണം വേണ്ട പ്രഖ്യാപനങ്ങള് ഇല്ലാത്തത്, പ്രഖ്യാപിത എംആര്പിയില് കൂടുതല് വില ഈടാക്കുക, എംആര്പി തിരുത്തുക, മറയ്ക്കുക തുടങ്ങിയ പായ്കേജ്ഡ് കമ്മോഡിറ്റീസ് ചട്ട ലംഘനങ്ങളും അളവുതൂക്ക ഉപകരണങ്ങള് മുദ്ര പതിപ്പിക്കാതെ ഉപയോഗിക്കുക, അവ മുദ്ര പതിപ്പിച്ചതിന്റെ രേഖകള് ഹാജരാക്കാത്തത്, അളവില് കുറച്ച് വില്പ്പന നടത്തുക തുടങ്ങിയ ലീഗല് മെട്രോളജി നിയമ ലംഘനങ്ങളും ആണ് പരിശോധനയ്ക്ക് വിധേയമാക്കിയത്. നിയമ ലംഘനങ്ങള് കണ്ടെത്തിയ 13 കേസുകള് രജിസ്റ്റര് ചെയ്തു. ഓണകാല വ്യാപാര രംഗത്ത് ഉപഭോക്തൃ ചൂഷണം വ്യാപകമാകാന് സാദ്ധ്യതയുള്ളതിനാല് വരും ദിവസങ്ങളിലും കര്ശന പരിശോധനകള് നടത്തുന്നതാണെന്ന് അസിസ്റ്റന്റ് കണ്ട്രോളര്മാര് അറിയിച്ചു. ഉപഭോക്താക്കള്ക്ക് പരാതിയുള്ള പക്ഷം 0471-249622, 2494752 എന്നീ നമ്പരുകളില് അറിയിക്കാം.
ലീഗല് മെട്രോളജി വകുപ്പ് കണ്ട്രോളര് മുഹമ്മദ് ഇക്ബാലിന്റെ നിര്ദേശാനുസരണം ദക്ഷിണ മേഖല ഡെ. കണ്ട്രോളര് റീനാ ഗോപാലാണ് ദക്ഷിണ മേഖലയിലെ പരിശോധനകള് ഏകോപിപ്പിച്ചത്. അതിന്റെ ഭാഗമായിട്ട് ജില്ലയില് തിരുവനന്തപുരം അസിസ്റ്റന്റ് കണ്ട്രോളര് എസ്. ശിവകുമാരന് നായര്, ഫ്ളൈയിംഗ് സ്ക്വാഡ് അസിസ്റ്റന്റ് കണ്ട്രോളര് ബി.എസ്. അജിത് കുമാര് എന്നിവര് നേതൃത്വം നല്കിയ പരിശോധനയില് സീനിയര് ഇന്സ്പെക്ടര് എസ്. ജയ, ഇന്സ്പെക്ടര്മാരായ എസ്. ശ്രീകുമാര്, വി.എല്. അനില് കുമാര്, എ. രതീഷ്, പി.റ്റി. ശ്രീകാന്ത്, ബി. പ്രിയ, ഇന്സ്പെക്ടിംഗ് അസിസ്റ്റന്റുമാരായ ജി.എസ്. പ്രേമചന്ദ്രന്, സി.ഇ. ജോസ്, എന്.എസ്. പ്രകാശന്, സി. വേണുഗോപാലന്, ബി. ദിജി, സതീഷ് കുമാര് എന്നിവര് പങ്കെടുത്തു.
