ആലപ്പുഴ: ലീഗല് മെട്രോളജി വകുപ്പ് ജില്ലയുടെ വിവിധ ഭാഗങ്ങളില് വസ്ത്രവ്യാപാരശാലകള് കേന്ദ്രീകരിച്ച് നടത്തിയ മിന്നല്പ്പരിശോധനയില് അഞ്ച് കേസുകള് എടുത്തു. ഓണക്കാലം അടുത്തതിനാല് വസ്ത്രവ്യാപാരശാലകളില്തിരക്ക് വര്ദ്ധിച്ചിട്ടുണ്ട്. ഈ മേഖലയില് ഉപഭോക്തൃസംരക്ഷണം സാദ്ധ്യമാകുന്നത് ലക്ഷ്യമിട്ട് ജില്ലയുടെ ഉത്തര ദക്ഷിണ മേഖലകളില് രണ്ട് സ്ക്വാഡുകള് തിരിച്ചാണ് റെയ്ഡുകള് നടന്നത്.
കേരളത്തിന് പുറത്തുള്ള പല സംസ്ഥാനങ്ങളില് നിന്നും നിര്ദ്ദിഷ്ട പ്രഖ്യാപനങ്ങള് ഇല്ലാതെ വരുന്ന വസ്ത്രങ്ങള് വളരെ ഉയര്ന്ന വിലയ്ക്കാണ് വിറ്റഴിച്ചിരുന്നത്. വസ്ത്രങ്ങളുടെ പായ്ക്കറ്റുകളില് വളരെ അത്യാവശ്യമായ മാക്സിമം റീട്ടെയില് പ്രൈസ്, പായ്ക്കറുടെ പൂര്ണ്ണമായ മേല്വിലാസം, നിര്മ്മാണ/പായ്ക്കിങ് തീയതി, കസ്റ്റമര് കെയര് നമ്പര് എന്നിവ ഇല്ലാത്തതിനും പായ്ക്കിങ് രജിസ്ട്രേഷന് ഇല്ലാതെ വസ്ത്ര ഉല്പ്പന്നങ്ങള് പായ്ക്ക് ചെയ്ത് വില്പ്പന നടത്തിയതിനുമാണ് അഞ്ച് കേസുകളും രജിസ്റ്റര് ചെയ്തത്.
ജില്ലയിലെ വിവിധ സ്ഥലങ്ങളില് നടത്തിയ മിന്നല്പ്പരിശോധനയ്ക്ക് അസിസ്റ്റന്റ് കണ്ട്രോളര്മാരായ ജെ.സി. ജീസണ്, എസ്. ഷെയ്ക്ക് ഷിബു എന്നിവര് നേതൃത്വം നല്കി. പരിശോധനയില് സീനിയര് ഇന്സ്പെക്ടര് അബ്ദുള് ഹഫീസ് എം, ഇന്സ്പെക്ടര്മാരായ ഷൈനി വാസവന്, കെ.കെ. ഉദയന്, ബിനു ബാലക്, സനോജ്, പ്രവീണ് എന്നിവരും പങ്കെടുത്തു.
