തിരുവനന്തപുരം: ക്വിറ്റ് ഇന്ത്യാ സമരകാലത്ത് ബ്രിട്ടീഷുകാര്ക്ക് വേണ്ടി ദാസ്യപ്പണി ചെയ്തവരാണ് കമ്യൂണിസ്റ്റുകാരെന്ന് കെപിസിസി പ്രസിഡന്റ് വി.എം.സുധീരന്. ഇന്ദിരാഭവനില് 74-ാം ക്വിറ്റ് ഇന്ത്യാ വാര്ഷികത്തോടനുബന്ധിച്ച് സംഘടിപ്പിച്ച ക്വിറ്റ് കമ്യൂണലിസം കണ്വന്ഷനില് അധ്യക്ഷത വഹിക്കുകയായിരുന്നു അദ്ദേഹം. കമ്യൂണിസ്റ്റുകാരുടെ അപമാനകരമായ ഭൂതകാലത്തെ വിസ്മരിച്ച് സ്വാതന്ത്ര്യദിനാഘോഷങ്ങള് സംഘടിപ്പിക്കുന്നത് തെറ്റുതിരുത്താനാണെങ്കില് അത് നല്ലതാണെന്നും സുധീരന് കൂട്ടിച്ചേര്ത്തു. ക്വിറ്റ് ഇന്ത്യാ സമരകാലത്ത് രാജ്യത്തെ ഒറ്റുകൊടുത്തവരാണ് മാര്ക്സിസ്റ്റ് പാര്ട്ടിയെന്ന് ഉദ്ഘാടനം നിര്വ്വഹിച്ച മുന്മുഖ്യമന്തി ഉമ്മന്ചാണ്ടി പറഞ്ഞു.
ഇന്ത്യയുടെ ദേശീയതയെ വഞ്ചിച്ചവരാണ് കമ്യൂണിസ്റ്റുകാരെന്നും ഇന്ത്യന് സ്വാതന്ത്ര സമരത്തെ വഞ്ചിച്ചവര് ഇപ്പോള് ആഘോഷം സംഘടിപ്പിക്കുന്നത് പ്രായശ്ചിത്തത്തിന്റെ ഭാഗമാണെന്നും പ്രതിപക്ഷനേതാവ് രമേശ് ചെന്നിത്തല പറഞ്ഞു.കേരളത്തില് ദളിത് പീഡനങ്ങളും, അക്രമങ്ങളും, കൊലപാതകങ്ങളും വര്ദ്ധിക്കുന്നു. പോലീസ് സ്റ്റേഷനുകളില് സാധാരണക്കാര്ക്ക് കയറിചെല്ലാന് കഴിയാത്ത അവസ്ഥയാണ്. പോലീസിനെ നിയന്ത്രിക്കുന്നത് മുഖ്യമന്ത്രി പിണറായി വിജയനാണ്. പോലീസ് നടപടികളില് ഡിജിപിതന്നെ മാപ്പ് ചോദിച്ച സംഭവം കേരളത്തില് ഇന്നുവരെ ഉണ്ടായിട്ടില്ല. പോലീസിനെ നിയന്ത്രിക്കാന് കഴിയാത്ത ഡിജിപി ആ സ്ഥാനത്തിരിക്കാന് യോഗ്യനല്ല. ആഭ്യന്തര വകുപ്പ് കൈയ്യാളുന്ന മുഖ്യമന്ത്രി പോലീസിനെ വിമര്ശിക്കുന്നത് ഡിജിപി കൈകൂപ്പി മാപ്പ് പറയുന്ന അവസ്ഥലജ്ജാകരമാണെന്നും രമേശ് ചെന്നിത്തല പറഞ്ഞു.
മുതിര്ന്ന നേതാവ് എം.എം. ജേക്കബ്ബ്, വി.എസ്. ശിവകുമാര് എംഎല്എ, കോണ്ഗ്രസ്സ് വക്താവ് പന്തളം സുധാകരന്, കെപിസിസി ട്രഷറര് അഡ്വ. ജോണ്സണ് എബ്രഹാം, മഹിളാ കോണ്ഗ്രസ് അധ്യക്ഷ ബിന്ദുകൃഷ്ണ തുടങ്ങിയവര് പങ്കെടുത്തു.
