തുറവൂര്: സ്വകാര്യ റിസോര്ട്ടുകളില് ചീട്ടുകളി സംഘങ്ങള് വിലസുന്നു. പോലീസ് പരിശോധന ഇല്ലാത്തതാണ് റിസോര്ട്ടുകള് കേന്ദ്രീകരിച്ച് സാമൂഹ്യവിരുദ്ധ പ്രവര്ത്തനങ്ങള് വര്ദ്ധിക്കാന് കാരണം. കഴിഞ്ഞ ദിവസം അന്ധകാരനഴി അഴീക്കലില് പ്രവര്ത്തിക്കുന്ന സ്വകാര്യ റിസോര്ട്ടില് നടത്തിയ റെയ്ഡില് പണംവച്ചു ചീട്ടുകളിക്കുന്ന 13 അംഗസംഘത്തെയാണ് പിടികൂടിയത്.
എറണാകുളം മരട് ചക്കാലപ്പറമ്പില് ജലാല് (42), നെടുമ്പാശേരി കൊല്ലറവീട്ടില് അഷ്റഫ്(45), അരൂക്കുറ്റി പഞ്ചായത്ത് വളയനാട് വീട്ടില് നാസര്(48), എറണാകുളം ശ്രീമൂലനഗരം പുത്തന്പുരയില്വീട്ടില് മക്കാര്(52), വയലാര് പഞ്ചായത്ത് സൂജനാട്ടുവെളി പ്രമോദ്(38), എറണാകുളം മുളവുകാട് കൊല്ലേടത്തുവീട്ടില് രാജേഷ് (43), കോട്ടയം മണര്കാട് വടക്കേയകത്തു വീട്ടില് മാത്യു(52), എറണാകുളം ഗോതുരുത്ത് സ്വദേശി ചെട്ടിപ്പറമ്പില് രാജേഷ് (48), എറണാകുളം ഗോതുരുത്ത് സ്വദേശി ചെട്ടിപ്പറമ്പില് നിഷാന്ത്(44), എറണാകുളം നെട്ടൂര് സ്വദേശി അഴീക്കകത്തുവീട്ടില് നിയാസ്(48), എറണാകുളം മണ്ണല സ്വദേശി വെള്ളേപ്പറമ്പില് ഷിനു(32), പൂച്ചാക്കല് വേലംചിറ നികര്ത്തില് കാസിംകുഞ്ഞ്(64), എറണാകുളം തമ്മനം ഊച്ചംപറമ്പില് സനിനു(45) എന്നിവരാണ് പിടിയിലായത്.
ഇവരില്നിന്നും ആറുലക്ഷത്തോളംരൂപയും പോലീസ് പിടിച്ചെടുത്തു. രഹസ്യവിവരത്തെ തുടര്ന്ന് കുത്തിയതോട് സിഐ കെ. സജീവ്, പട്ടണക്കാട് എസ്ഐ നിസാം, കുത്തിയതോട് എസ്ഐ അഭിലാഷ് എന്നിവരുടെ നേതൃത്വത്തിലുള്ള പോലീസ്സംഘം ശനിയാഴ്ച രാത്രി പത്തോടെ റിസോര്ട്ട് വളഞ്ഞാണ് ഇവരെ പിടികൂടിയത്.
വിനോദസഞ്ചാരികളുടെ എണ്ണം കുറയുന്ന സാഹചര്യത്തില് വരുമാനം തീരെ കുറയുന്ന സാഹചര്യത്തിലാണ് ഇത്തരം അസാന്മാര്ഗ പ്രവര്ത്തനങ്ങള് നടത്തുന്നവര്ക്ക് മുറികള് നല്കാന് നിര്ബന്ധിതരാകുന്നതെന്നാണ് റിസോര്ട്ടുകാര് പറയുന്നത്.
