കുട്ടനാട്: കുട്ടനാട് താലൂക്ക് വികസന സമിതി യോഗത്തില് വിവിധ സര്ക്കാര് വകുപ്പുകള്ക്കെതിരേ രൂക്ഷവിമര്ശനം. കുട്ടനാട്ടിലെ കുടിവെള്ളവിതരണം സംബന്ധിച്ചായിരുന്നു പ്രധാന പരാതി. കുട്ടനാട്ടിലെ വിവിധ ഗ്രാമപഞ്ചായത്തുകളില് നിന്നുള്ള പ്രതിനിധികള്, രാഷ്ട്രീയകക്ഷി നേതാക്കള് എന്നിവരാണ് പ്രതിഷേധമറിയിച്ചത്.
കുടിവെള്ളപദ്ധതികള് കാര്യക്ഷമമായി നടക്കുന്നില്ലെന്ന് ജനപ്രതിനിധികള് ആരോപിച്ചു. പങ്കെടുത്ത ഗ്രാമപഞ്ചായത്തുകള് എല്ലാം തന്നെ ജലവിഭവ വകുപ്പിനെതിരേ രൂക്ഷ വിമര്ശനമാണ് നടത്തിയത്. നീരേറ്റുപുറത്ത് പ്ലാന്റ് പ്രവര്ത്തനമാരംഭിച്ച് വര്ഷങ്ങള് കഴിയുമ്പോഴും കുട്ടനാട്ടിലെ എല്ലാ പഞ്ചായത്തുകളിലും ഇനിയും ജലവിതരണം തുടങ്ങിയിട്ടില്ല. വകുപ്പുമായി ബന്ധപ്പെട്ട ഉത്തരവാദിത്വപ്പെട്ട പ്രതിനിധികള് യോഗത്തിലില്ലാതിരുന്നത് പ്രതിഷേധത്തിനിടയാക്കി.
അടുത്ത യോഗത്തില് അസി. എക്സിക്യൂട്ടീവ് എന്ജിനിയര് ഉള്പ്പടെയുള്ള മുതിര്ന്ന ഉദ്യോഗസ്ഥര് പങ്കെടുക്കണമെന്ന് യോഗം ആവശ്യപ്പെട്ടു. കുട്ടനാട്ടിലെ പൊതുമരാമത്ത് വകുപ്പുകളില് എന്ജിനിയര്മാരുടെ അഭാവമുണെ്ടന്ന് ജനപ്രതിനിധികള് ചൂണ്ടിക്കാട്ടി. ആരോഗ്യവകുപ്പിലെ ഒരു ഉദ്യോഗസ്ഥന് പോലും യോഗത്തില് പങ്കെടുക്കാതിരുന്നതിലും പ്രതിഷേധം ഉയര്ന്നു.
ഈ സാഹചര്യത്തില് കുട്ടനാട്ടിലെ പുളിങ്കുന്ന് താലൂക്ക് ആശുപത്രി നേരിടുന്ന പ്രശ്നങ്ങളും യോഗത്തില് ചര്ച്ച ചെയ്യാനായില്ല. കുട്ടനാട്ടിലെ റെയില്വേ റിസര്വേഷന് കേന്ദ്രങ്ങള് നിര്ത്തലാക്കരുതെന്നും കെഎസ്ആര്ടിസി, വാട്ടര് ട്രാന്സ്പോര്ട്ട് സര്വീസുകളിലെ പ്രശ്നങ്ങള് പരിഹരിക്കണമെന്നും യോഗത്തില് ആവശ്യമുയര്ന്നു.
