തദ്ദേശസ്വയംഭരണ മന്ത്രി കെ.ടി.ജലീല് നയതന്ത്രപാസ്പോര്ട്ടിന് അപേക്ഷിച്ച് കിട്ടിയില്ലെന്ന വിലാപമാണ് കേരളത്തില് നടക്കുന്നത്. കെ.ടി.ജലീല് മാത്രമല്ല, മുഖ്യമന്ത്രി പിണറായി വിജയനും പ്രശ്നത്തില് ഇടപെട്ട് പ്രതികരിച്ചിരിക്കുകയാണ്. സൗദിയിലെ തൊഴില് പ്രശ്നത്തില് അവിടെ ചെന്ന് കേരള മന്ത്രിക്ക് ഇടപെടാന് അവസരം ലഭിച്ചില്ലെന്നതാണ് പ്രശ്നം. സൗദി അറേബ്യ ഭാരതത്തിലെ ഒരു സംസ്ഥാനമല്ല, മറ്റൊരു രാജ്യമാണ്. അവിടെ നയതന്ത്രപരമായ വിഷയത്തില് ഇടപെടാന് ഒരു സംസ്ഥാനമന്ത്രിക്ക് ഒരവകാശവും അധികാരവും നല്കുന്നില്ല. ഒരു സാധാരണ പൗരന് എന്തൊക്കെ ചെയ്യാനാകുമോ അതില് കവിഞ്ഞ ഒരു ഇടപെടലിനും സംസ്ഥാന മന്ത്രിക്കാവില്ല. ഇതറിയാതെയല്ല സൗദിയിലേക്ക് പോകാന് കെ.ടി.ജലീലിനെ മുഖ്യമന്ത്രി ചുമതലപ്പെടുത്തിയത്.
നയതന്ത്ര പാസ്പോര്ട്ട് ആരെങ്കിലും ചോദിച്ചുവാങ്ങേണ്ടതല്ല. കേന്ദ്ര സര്ക്കാര് ഏല്പിക്കുന്ന ചുമതലയാണത്. സംസ്ഥാന മന്ത്രിയെയോ ഉദ്യോഗസ്ഥരെയോ ഏതെങ്കിലും ദൗത്യം കേന്ദ്ര സര്ക്കാര് ഏല്പിക്കുന്നെങ്കില് അവര്ക്കനുവദിക്കുന്ന പാസ്പോര്ട്ടാണ് നയതന്ത്ര പാസ്പോര്ട്ട്. പാര്ലമെന്റ് അംഗങ്ങള്ക്ക് ഈ പാസ്പോര്ട്ട് അനുവദിച്ചിട്ടുണ്ട്. നയതന്ത്ര പാസ്പോര്ട്ട് എയര്പോര്ട്ടില് പ്രത്യേക പരിഗണന ലഭിക്കുമെന്നല്ലാതെ സൗദിയിലെ മറ്റ് ഭാഗങ്ങളില് ഇവകൊണ്ട് പ്രയോജനമില്ലെന്ന് ഒരു മന്ത്രിക്ക് അറിയാത്തതാണോ? നോര്ക്ക വകുപ്പിന്റെ ചുമതലപോലും ഈ മന്ത്രിക്കില്ല.
നോര്ക്ക സെക്രട്ടറിപോലും ജലീലിന്റെ സംഘത്തിലുണ്ടായില്ല. യുപിഎ സര്ക്കാരിന്റെ കാലത്ത് നോര്ക്ക ചുമതലയുണ്ടായിരുന്ന കെ.സി.ജോസഫിനെ കേന്ദ്ര സര്ക്കാര് സമാന രീതിയില് വിലക്കിയിരുന്നു. അന്ന് പ്രവാസി മന്ത്രി വയലാര് രവിയും വിദേശകാര്യമന്ത്രി ഇ.അഹമ്മദുമാണ് സൗദിയില് കാര്യങ്ങള് നോക്കിയത്. ഇപ്പോള് നല്ലനിലയില് പ്രവര്ത്തിക്കുന്ന കേന്ദ്രസര്ക്കാരിനെതിരെ വിലകുറഞ്ഞ ആക്ഷേപം നടത്തിയത് ഖേദകരമാണ്.
