വാഷിങ്ടണ്: ഭാരത- അമേരിക്കന് വംശജയും മലയാളിയുമായ പ്രമീളാ ജയപാല് യുഎസ് കോണ്ഗ്രസിലേയ്ക്കുള്ള ആദ്യ തെരഞ്ഞെടുപ്പില് വിജയിച്ചു. ഡെമോക്രാറ്റിക് സ്ഥാനാര്ത്ഥിയായ ഇവര് നിലവില് വാഷിങ്ടണ് സ്റ്റേറ്റ് സെനറ്റര് കൂടിയാണ്. നവംബറില് നടക്കുന്ന പൊതുതെരഞ്ഞെടുപ്പില് വിജയിച്ചാല് യുഎസ് കോണ്ഗ്രസിലേയ്ക്ക് തെരഞ്ഞെടുക്കപ്പെടുന്ന ആദ്യ മലയാളി വനിതയായിരിക്കും പ്രമീള.
ചെന്നൈയില് ജനിച്ച മലയാളിയായ പ്രമീള വിദ്യാര്ത്ഥിയായിട്ടാണ് 1982ല് അമേരിക്കയില് എത്തിയത്. ഉന്നത വിദ്യാഭ്യാസത്തിന് ശേഷം അഭയാര്ത്ഥികള്ക്കായി നടത്തിയ പ്രചാരണ പ്രവര്ത്തനങ്ങളിലൂടെയാണ് ശ്രദ്ധാകേന്ദ്രമാവുന്നത്. പിന്നീട് പൊതുരംഗത്ത് ശക്തമായ സാന്നിദ്ധ്യമായി മാറിയ ഇവര് ഡെമോക്രാറ്റിക് പാര്ട്ടിയിലൂടെയാണ് സെനറ്റര് ആകുന്നത്. പാര്ട്ടിയുടെ വനിതാ വിഭാഗത്തിന്റെയും ലേബര് യൂണിയന്റെയും തലപ്പത്തെത്തി. പ്രൈമറി തെരഞ്ഞെടുപ്പില് പ്രധാനമായും നാല് എതിരാളികളാണ് ഇവര്ക്കുണ്ടായിരുന്നത്.
ആദ്യ തെരഞ്ഞെടുപ്പില് രണ്ടാം സ്ഥാനത്ത് എത്തിയ ജോ മക് ഡെര്മോട്ടോ, അല്ലെങ്കില് ബ്രാഡി വാല്ക്കിന് ഷായോ ആയിരിക്കും നവംബറില് നടക്കുന്ന പൊതു തെരഞ്ഞെടുപ്പില് പ്രമീളയുടെ മുഖ്യഎതിരാളികളെന്നാണ് റിപ്പോര്ട്ടുകള്. ജനങ്ങള് വലിയൊരു മാറ്റത്തിനായി ആഗ്രഹിക്കുന്നുണ്ട് അതിനാല് തന്നെ ശക്തമായ പോരാട്ടം തന്നെയായിരിക്കും കാഴ്ചവെക്കുക. അമേരിക്കയുടെ ഭാവി സംബന്ധിച്ച് ക്രിയാത്മകമായ കാഴ്ചപ്പാടാണ് ഉള്ളതെന്നും പ്രമീള പറഞ്ഞു.
