നോയിഡ: യുപിയിലെ ബുലന്ദേശ്വറില് അമ്മയെയും മകളെയും തട്ടിക്കൊണ്ടുപോയി കൂട്ടബലാത്സംഗം ചെയ്ത കേസിലെ പ്രതികളെ തങ്ങള്ക്ക് കൈമാറാന് ആവശ്യപ്പെട്ട് പീഡനത്തിനിരയായവരുടെ കുടുംബം. തങ്ങള്ക്ക് പ്രതികളെ കൈമാറൂ, അവരെ പൊതുനിരത്തില് വെടിവെച്ച് കൊലപ്പെടുത്താമെന്ന് അഖിലേഷ് സര്ക്കാരിനോട് കുടുംബം ആഹ്വാനം ചെയ്തു.
പ്രതികളെ പൊതു സമൂഹത്തിന് മുന്നില് വെച്ച് ശിക്ഷിക്കാന് തന്റെ ഭാര്യയ്ക്കും മകള്ക്കും അനുമതി നല്കണമെന്ന് പീഡനത്തിനിരയായ സ്ത്രീയുടെ ഭര്ത്താവ് ഒരു ദേശീയ മാധ്യമത്തിനോട് പറഞ്ഞു. അതിന് സാധ്യമല്ലെങ്കില് വിഷം കഴിച്ച് കുടുംബസമേതം ആത്മഹത്യ ചെയ്യുമെന്നും അദ്ദേഹം പറഞ്ഞു.
ഇത്തരം സംഭവങ്ങള് ഇനി സമൂഹത്തില് ആവര്ത്തിക്കാതിരിക്കണമെന്ന് പീഡനത്തിനിരയായ 14 വയസുകാരിയുടെ അമ്മാവന് പറഞ്ഞു. നിങ്ങളുടെ കുടുബങ്ങളിലെ ആര്ക്കെങ്കിലും ഇത്തരം ഗതിക്കേട് വരുമ്പോള് മാത്രമേ അതിന്റെ ആഘാതം മനസ്സിലാക്കാന് സാധിക്കുകയുള്ളെന്നും അദ്ദേഹം പറഞ്ഞു.
ദല്ഹി-കാണ്പുര് ദേശീയ പാത 91 ല് വെള്ളിയാഴ്ച രാത്രിയാണ് രാജ്യത്തെ ഞെട്ടിച്ച സംഭവം അരങ്ങേറിയത്. 35 കാരിയായ യുവതിയും ഇവരുടെ 14 വയസുള്ള മകളും പീഡനത്തിന് ഇരയാകുകയായിരുന്നു. നോയിഡയില്നിന്ന് ഷാജഹാന്പുരിലേക്ക് കുടുംബസമേതം പോകും വഴി, ബുലന്ദേശ്വറിലെ ദോസ്ത്പുര് ഗ്രാമത്തില് വെച്ചായിരുന്നു അഞ്ചംഗ സംഘം ഇവരുടെ കാറിനെ ആക്രമിച്ചത്.
റോഡിനു നടുവിലുള്ള വസ്തുവില് തട്ടി ഇവരുടെ കാര് തകരാറിലാവുകയായിരുന്നു. തുടര്ന്ന് റോഡരികില് ഒളിച്ചിരുന്ന അക്രമിസംഘം തോക്ക് ചൂണ്ടി ഭീഷണിപ്പെടുത്തി ഇവരുടെ 11,000 രൂപയും സ്വര്ണവും മൊബൈല് ഫോണുകളും കവര്ന്നു. സംഘത്തിലെ പുരുഷന്മാരെ കയറുപയോഗിച്ച് കെട്ടിയിട്ട് അമ്മയെയും മകളെയും മറ്റൊരു സ്ഥലത്തേക്കുകൊണ്ടുപോയി ബലാത്സംഗം ചെയ്യുകയായിരുന്നു. തുടര്ന്ന് പ്രതികള് ഓടിരക്ഷപ്പെട്ടു.
തകരാറിലായ വാഹനം പ്രവര്ത്തിപ്പിക്കാനാകാതെ അന്ന് രാത്രിമുഴുവന് കുടുംബത്തിന് വിജനമായ സ്ഥലത്ത് കഴിയേണ്ടിവന്നു. ശനിയാഴ്ച രാവിലെ അടുത്തുള്ള പോലീസ് സ്റ്റേഷനിലത്തെി കുടുംബം പരാതി നല്കുകയായിരുന്നു. സംഭവത്തില് കേസെടുത്ത് അന്വേഷണം ആരംഭിച്ചു. സംഭവം നടന്ന സ്ഥലത്തിന് 100 മീറ്റര് മാത്രം അകലെ പോലീസ് ചെക്ക് പോസ്റ്റ് പ്രവര്ത്തിച്ചിരുന്നു.
സംഭവവുമായി ബന്ധപ്പെട്ട് മൂന്ന് പേരെ അറസ്റ്റ് ചെയ്തിട്ടുണ്ടെന്നും ഇവരെ ഇരകള് തിരിച്ചറിഞ്ഞിട്ടുണ്ടെന്നുമാണ് യുപി പോലീസിന്റെ ഭാഷ്യം.
