ആലപ്പുഴ: അഖിലേന്ത്യാ പോസ്റ്റൽ വെയ്റ്റ്ലിഫ്റ്റിങ്, പവർലിഫ്റ്റിങ് ചാമ്പ്യൻഷിപ്പ് ഇന്ന് സമാപിക്കും. ഭാരോദ്വഹന മത്സരങ്ങൾ ഇന്നുച്ചവരെ തുടരും. ഉച്ചയ്ക്കുശേഷം ശരീര സൗന്ദര്യ മത്സരം നടക്കും. സമാപന സമ്മേളനത്തിൽ ഒളിമ്പ്യൻ മനോജ് ലാൽ, ആലപ്പുഴ നഗരസഭാ അദ്ധ്യക്ഷൻ തോമസ് ജോസഫ് തുടങ്ങിയവർ പങ്കെടുക്കും.
ഇന്നലെ നടന്ന ഭാരോദ്വഹനം 120 കിലോ പുരുഷ വിഭാഗത്തിൽ ഝാർഖണ്ഡിന്റെ ദേബീപ്രസാദ് ചാറ്റർജി 735 കിലോ ഉയർത്തി ഒന്നാംസ്ഥാനം നേടി. തമിഴ്നാടിന്റെ പി. ഇസാക്കിമുത്തു വിനോദ് 715 കിലോ ഉയർത്തി രണ്ടാംസ്ഥാനവും, രാജസ്ഥാനിന്റെ സൗരഭ് മെഹ്ത്താ 577.5 കിലോ ഉയർത്തി മൂന്നാം സ്ഥാനവും നേടി. 120 കിലോ അധികം ഭാരമുള്ള പുരുഷ വിഭാഗത്തിൽ തമിഴ്നാടിന്റെ ഉദയകുമാർ 600 കിലോ ഉയർത്തി ഒന്നാം സ്ഥാനം നേടി.
ആന്ധ്രാപ്രദേശിന്റെ കെ. രാംമോഹൻ റാവു രണ്ടാം സ്ഥാനവും, കർണാടകയുടെ കെ. ഗണേഷ് കിണി മൂന്നാം സ്ഥാനവും നേടി. വെയ്റ്റ് ലിഫ്റ്റിങ് വിഭാഗത്തിൽ ഒറീസയാണ് ഒന്നാം സ്ഥാനം നേടിയത്.
