കുട്ടനാട്: ഡിഇഒ ഓഫീസില് മോഷണം. ജീവനക്കാരനും സുഹൃത്തും അറസ്റ്റില്. കുട്ടനാട് വിദ്യാഭ്യാസ ജില്ലാ ഓഫീസില് എട്ടുലക്ഷത്തോളം രൂപ അപഹരിച്ചതുമായി ബന്ധപ്പെട്ട് ഓഫീസിലെ ജീവനക്കാരനും സുഹൃത്തുമാണ് അറസ്റ്റിലായത്. ഓഫീസിലെ ക്ലാര്ക്കായ ഓതറ വെസ്റ്റ് തുരുത്തിക്കോണം വീട്ടില് ജേക്കബ്ഡോണ് (27), സുഹൃത്തായ വള്ളംകുളം ഇരവിപുരം ശ്രീമംഗലത്ത് വീട്ടില് അനുസ്റ്റീഫന് (26) എന്നിവരാണ് പിടിയിലായത്. ഓഫീസിലെ പണം സൂക്ഷിച്ചിരുന്ന ചെസ്റ്റില് നിന്നും 7,70,000 രൂപയാണ് ചൊവ്വാഴ്ച രാത്രി മോഷ്ടിക്കപ്പെട്ടത്. തൊട്ടടുത്ത ദിവസം മുറി വൃത്തിയാക്കാന് ജീവനക്കാരനെത്തിയപ്പോഴാണ് മോഷണം നടന്നവിവരം പുറത്തറിയുന്നത്.
സംഭവത്തെപ്പറ്റി പോലീസ് പറയുന്നതിങ്ങനെ: കാഷ് സെക്ഷന് വിഭാഗത്തിന്റെ ചുമതലയുള്ള ക്ലാര്ക്കായിരുന്ന ജേക്കബിന് ചെസ്റ്റിനകത്തെ തുകയെപ്പറ്റി നേരത്തെ ധാരണയുണ്ടായിരുന്നു. രണ്ട് താക്കോല് ഉപയോഗിച്ച് തുറക്കാന് കഴിയുന്ന ചെസ്റ്റിന്റെ ഒരു താക്കോല് ഡിഇഒയുടെ പിഎയുടെ കൈവശവും മറ്റൊരണ്ണം ഓഫീസിലെ മേശക്കകത്തുമാണ് സൂക്ഷിച്ചിരുന്നത്.
സംഭവം ദിവസം രാവിലെ പിഎയുടെ കൈവശമുണ്ടായിരുന്ന താക്കോല് കരസ്ഥമാക്കി ജേക്കബ് ഒരു പൂട്ട് നേരത്തെ തുറന്നിട്ടിരുന്നു. പിന്നീട് താക്കോല് പിഎയുടെ മേശപ്പുറത്ത് തിരികെ വയ്ക്കുകയും ചെയ്തു. അന്ന് വൈകിട്ട് ഓഫീസ് വിട്ടിറങ്ങിയ ജേക്കബ് പിറക് വശത്തെ കതകിന്റെ കുറ്റി തുറന്നിട്ടിരുന്നു. രാത്രി സുഹ്യത്തായ അനുവുമൊത്ത് ഓഫീസി ലെത്തിയ ജേക്കബ് തുടര്ന്ന് മേശക്കകത്ത് നിന്നും ചെസ്റ്റിന്റെ രണ്ടാമത്തെ താക്കോല് കൈക്കലാക്കിയ ശേഷമാണ് മോഷണം നടത്തിയത്.
സംഭവത്തിന് പിന്നില് പുറത്തു നിന്നുളളവരല്ല, ജീവനക്കാരാണെന്ന് നേരത്തെ തന്നെ പോലീസിന് സംശയമുണ്ടായിരുന്നു. ഇതിന്റെ അടിസ്ഥാനത്തില് ജീവനക്കാരെ ചോദ്യം ചെയ്തപ്പോഴാണ് പ്രതിപിടിയിലായത്.
