ഇരിട്ടി: കച്ചേരിക്കടവ് പുഴയില് ബാരാപ്പോള് മിനി ജലവൈദ്യുതിപദ്ധതിക്ക് സമീപ പ്രദേശങ്ങളിലെ മത്സ്യങ്ങള് കൂട്ടത്തോടെ ചത്തുപൊങ്ങുന്നത് ജനങ്ങളില് ആശങ്കയുണര്ത്തുന്നു. വലിയ വ്രണങ്ങള് ശരീരത്തില് രൂപപ്പെട്ട ശേഷമാണ് മത്സ്യങ്ങള് ചത്തുപൊങ്ങുന്നത്. ഇവ രോഗംപിടിച്ചു ചത്തുപൊങ്ങാന് തുടങ്ങിയിട്ട് ഒരാഴ്ചയിലേറെയായെന്നു സമീപവാസികള് പറയുന്നു. പുഴയിലെ മത്സ്യങ്ങളിലെല്ലാം ഈ രോഗം വ്യാപകമായി കണ്ടുതുടങ്ങിയതോടെ പുഴയെ പല കാര്യങ്ങള്ക്കും ആശ്രയിക്കുന്ന ജനങ്ങളും ആശങ്കയിലായി.
ബാരോപ്പോള് പദ്ധതിക്ക് വേണ്ടി ഈ പ്രദേശങ്ങളിലെ കരിങ്കല് പാറകളും മറ്റും വ്യാപകമായി പൊട്ടിക്കുകയും ഇവ പൊട്ടിക്കാന് പല രാസവസ്തുക്കളും ഉപയോഗിക്കുകയും ചെയ്തിരുന്നു. ഇവ മഴ പെയ്യാന് തുടങ്ങിയതോടെ ഒഴുകി വെള്ളത്തില് കലരാന് തുടങ്ങിയതാണോ ഇതിനു കാരണമായതെന്ന സംശയമാണ് ഇപ്പോള് ജനങ്ങള്ക്കുള്ളത്. മത്സ്യങ്ങള് രോഗം പിടിച്ചു ചത്തുപൊങ്ങുന്നത് നാട്ടുകാര് അധികൃതരുടെ ശ്രദ്ധയില്പ്പെടുത്തിയെങ്കിലും ആരും ഇതുവരെ തിരിഞ്ഞു നോക്കിയില്ലെന്നും പ്രദേശവാസികള് പരാതി പറയുന്നു. അടിയന്തിരമായി ബന്ധപ്പെട്ട വകുപ്പുകള് ഇതിന്റെ കാരണം കണ്ടുപിടിക്കാന് തയ്യാറാവണമെന്നും ഈ വിഷയത്തില് ജനങ്ങള്ക്കുണ്ടായിട്ടുള്ള ആശങ്ക അകറ്റാന് തയ്യാറാവണമെന്നു മാണ് ജനങ്ങള് ആവശ്യപ്പെടുന്നത്.
