വാരനാട് ദേവിക്ഷേത്രത്തില്‍ നടത്തിയ വൃക്ഷകലശാഭിഷേകത്തില്‍ നിന്ന്‌
ചേര്‍ത്തല: വാരനാട് ദേവിക്ഷേത്രത്തിലെ നക്ഷത്രക്കാവില്‍ വൃക്ഷ കലശാഭിഷേകവും പൂജകളും ഭക്തജന സഹസ്രങ്ങള്‍ക്ക് ദര്‍ശന സായൂജ്യമായി. ജോതിഷശാസ്ത്ര പ്രകാരം വിവിധ നാളുകാര്‍ക്ക് വിധിക്കപ്പെട്ട 27 വൃക്ഷങ്ങള്‍ക്കും പ്രത്യേകം പ്രത്യേകം കലശാഭിഷേകവും പൂജകളും നടത്തി. തങ്ങളുടെ നക്ഷത്രപ്രകാരമുള്ള വൃക്ഷത്തിന് കലശാഭിഷേകവും പൂജകളും നടത്തുന്നതു കാണാന്‍ വന്‍ ഭക്തജനത്തിരക്കാണ് അനുഭവപ്പെട്ടത്.
വെള്ളിയാഴ്ച രാവിലെ പത്തരയോടെ ആരംഭിച്ച പൂജാദി കര്‍മ്മങ്ങള്‍ക്ക്, ക്ഷേത്രം തന്ത്രിമാരായ കടിയക്കോല്‍ ഇല്ലത്ത് കൃഷ്ണന്‍ നമ്പൂതിരി, വാസുദേവന്‍ നമ്പൂതിരി എന്നിവര്‍ മുഖ്യകാര്‍മ്മികരായി. മേല്‍ശാന്തി ഈശ്വരന്‍ നമ്പൂതിരി, മുരളീധരന്‍പോറ്റി, പ്രകാശന്‍ പോറ്റി, നാരായണന്‍ എമ്പ്രാന്‍, വൈക്കം മധുസൂദനന്‍പോറ്റി, മധുസൂദനന്‍പോറ്റി, നാരായണന്‍ പോറ്റി എന്നിവര്‍ സഹകാര്‍മ്മികരായി.
ക്ഷേത്രത്തിന്റെ വടക്കു കിഴക്കു ഭാഗത്ത് പ്രത്യേകം കെട്ടിത്തിരിച്ച സ്ഥലത്തെ നക്ഷത്രക്കാവില്‍ വൃക്ഷങ്ങള്‍ക്ക് സമീപം ഒരോ നക്ഷത്രത്തിനും വിധിച്ചിട്ടുള്ള പക്ഷികളുടെയും മൃഗങ്ങളുടെയും രൂപങ്ങളും സ്ഥാപിച്ചിട്ടുണ്ട്. ഓരോ നാളുകാര്‍ക്കും അവരുടെ വൃക്ഷങ്ങള്‍ക്ക് സ്വന്തമായി കലശാഭിഷേകം നടത്താനും സൗകര്യമേര്‍പ്പെടുത്തി. നൂറ് കണക്കിന് ഭക്തര്‍ കലശാഭിഷേകം നടത്തി. വെള്ളിയാഴ്ച രാവിലെ എട്ടിന് പള്ളിശ്രാമ്പിന്റെ ആദ്യപൂജയും തന്ത്രി നിര്‍വഹിച്ചു.
