ധാക്ക:അനധികൃത പണമിടപാട് കേസില് ബംഗ്ലാദേശ് പ്രതിപക്ഷ നേതാവ് ഖാലീദാ സിയയുടെ മകന് താരിഖ് റഹ്മാന് ഏഴു വര്ഷം തടവ്. 17 കോടിയോളം രൂപയുടെ കള്ളപ്പണമിടപാട് നടത്തിയതിനാണ് ശിക്ഷ.
നേരത്തെ കേസ് പരിഗണിച്ച കീഴ്കോടതി താരിഖ് റഹ്മാനെ(48) കുറ്റവിമുക്തനാക്കിയിരുന്നു. എന്നാല് കീഴ്കോടതി വിധി അസാധുവാക്കികൊണ്ടാണ് ഹൈക്കോടതി താരിഖിനെ കുറ്റക്കാരനാണെന്ന് കണ്ടെത്തിയത്.
തടവു ശിക്ഷക്കു പുറമേ 17 കോടി രൂപാ പിഴയും വിധിച്ചു. താരിഖിന്റെ ബിസിനസ് പങ്കാളി ഗിയാസുദ്ദീന് അല് മാമുന് കീഴ്കോടതി വിധിച്ച 7 വര്ഷം തടവ് ഹൈക്കോടതി ശരിവച്ചു.
അതേസമയം താരിഖിന്റെ രാഷ്ട്രീയ മോഹങ്ങള്ക്ക് കനത്ത തിരിച്ചടിയാണ് കോടതി വിധി,രണ്ടു തവണ പ്രധാനമന്ത്രിയായിരുന്ന ഖാലിദയുടെ രാഷ്ട്രീയ അനന്തരാവകാശിയാകുമെന്ന് കരുതിയിരിക്കുന്ന സമയത്താണ് തടവ് ലഭിച്ചത്.
തന്റെ രാഷ്ട്രീയ സ്വാധീനം ഉപയോഗിച്ച് തന്റെ സുഹൃത്ത് ഗിയാസുദ്ദീന് മാമൂന് താരിഖ് 2000 ലക്ഷം ടാക്ക( 25 ലക്ഷം ഡോളര്) ശരിയാക്കി നല്കിയെന്നും ഈ തുക ഇവര് ഒരു ഊര്ജ്ജ പദ്ധതി നടപ്പാക്കാന് കോഴ നല്കിയും സിംഗപ്പൂരില് കടം കൊടുത്തും വന് ലാഭം ഉണ്ടാക്കിയെന്നാണ് കേസ്. സുപ്രീം കോടതി ഈ വിധി റദ്ദാക്കിയില്ലെങ്കില് താരിഖിന് രാഷ്ട്രീയത്തില് തുടരാന് കഴിയില്ല.
