കൊച്ചി: വ്യാവസായിക സംരംഭങ്ങള്ക്ക് പരിഷ്കരണ അജണ്ട ആവിഷ്കരിക്കേണ്ടത് വളര്ച്ച മുരടിച്ച സംസ്ഥാന സമ്പദ്ഘടനയ്ക്ക് അനിവാര്യമാണെന്ന് ഇന്സ്റ്റിറ്റിയൂട്ട് ഓഫ് സ്മാള് എന്റര്പ്രൈസസ് ആന്റ് ഡെവലപ്പ്മെന്റ് സംസ്ഥാന ധനകാര്യമന്ത്രിക്ക് സമര്പ്പിച്ച ബജറ്റ് പൂര്വ മെമ്മോറാണ്ടത്തില് നിര്ദ്ദേശിച്ചു. നിക്ഷേപ സൗഹാര്ദ്ദമായ അന്തരീക്ഷം സൃഷ്ടിക്കുന്നതിനും നിലവിലുള്ള പദ്ധതികളും പരിപാടികളും ഉടച്ചുവാര്ക്കുന്നതിനുമായി 32 ഇന അജണ്ട ഐഎസ്ഇഡി മുന്നോട്ടുവച്ചു.
സംസ്ഥാനത്ത് സംരംഭകര്ക്ക് സുഖകരമല്ലാത്ത അവസ്ഥയാണുള്ളതെന്ന് മെമ്മോറാണ്ടത്തില് പറയുന്നു. ശാസ്ത്രീയമായ സാമ്പത്തിക വിശകലന രീതികളിലൂടെയാണ് ഇന്സ്റ്റിറ്റിയൂട്ട് ഈ നിഗമനങ്ങളിലെത്തിയത്. കേരളത്തിന്റെ വികസനം സാധ്യമാകണമെങ്കില് കുറുക്കുവഴികളില്ല. പുതിയ സംരംഭങ്ങള് ഉണ്ടാകുന്നതോടൊപ്പം തന്നെ അവയുടെ പരിരക്ഷയ്ക്കാവശ്യമായ അനുകൂല പരിസ്ഥിതി ഉറപ്പാക്കുവാന് ഗവണ്മെന്റിന് കടമയുണ്ട്. എന്നാല്, നൂറ് പുതിയ സംരംഭങ്ങള് ഉണ്ടാകുമ്പോള് 30 ല് കുറയാതെ എണ്ണം രോഗാതുരമാവുകയും പ്രവര്ത്തനം നിലയ്ക്കുകയും ചെയ്യുന്നതാണ് ഇന്നത്തെ സ്ഥിതി. സ്വയം തൊഴിലിനെപ്പറ്റി ചിന്തിക്കുന്നവര് തുലോം കുറവ്. സംസ്ഥാന സമ്പദ്ഘടനയില് സംരംഭ മേഖലയ്ക്ക് വേണ്ടത്ര പ്രാധാന്യം നല്കിയിട്ടില്ല. ഇതാണ് തൊഴില് തേടി വിദേശ ജോലിക്കായി യുവാക്കള് കാത്ത് നില്ക്കുന്നതെന്ന് ഐഎസ്ഇഡി ഡയറക്ടര് ഡോ.പി.എം.മാത്യു ചൂണ്ടിക്കാട്ടി.
ചെറുകിട ഇടത്തരം മൈക്രോ സംരംഭങ്ങള്ക്കായുള്ള ആസന്നമായ ദേശീയ നയത്തിന് മാര്ഗ്ഗരേഖ തയ്യാറാക്കാന് കേന്ദ്ര സര്ക്കാര് ഐഎസ്ഇഡിയെ ചുമതലപ്പെടുത്തിയിട്ടുണ്ട്. പ്രധാനമന്ത്രി നിയമിച്ച, മുന് ക്യാബിനറ്റ് സെക്രട്ടറി പ്രഭാത് കുമാര് അധ്യക്ഷനായുള്ള ഉന്നതാധികാര സമിതി ഈ വര്ഷം ഒക്ടോബറില് ഇതു സംബന്ധിച്ച റിപ്പോര്ട്ട് സമര്പ്പിക്കുമെന്ന് പ്രതീക്ഷിക്കുന്നു.
