കൊച്ചി: കടമക്കുടി പൊക്കാളിപ്പാടം നികത്തലിനെതിരെ സമരം നടത്തിയ സിപിഎം അധികാരത്തിലെത്തിയതോടെ പാടം നികത്തലിന് ഒത്താശ ചെയ്യുകയാണെന്ന് സമീപവാസികള് കുറ്റപ്പെടുത്തി. ഭരണത്തിലേറി ഒരു മാസമാകും മുമ്പേ കടമക്കുടിയിലെ കോതാട് പെരിയാറിനോട് ചേര്ന്നുള്ള 4.5 ഏക്കര് പൊക്കാളിപ്പാടം പ്രാദേശിക നേതാവും ഏരിയാ കമ്മറ്റി അംഗത്തിന്റെ നേതൃത്വത്തില് ചെമ്മണ്ണിട്ട് നികത്തിക്കൊണ്ടിരിക്കുന്നു. മുന് ഡിവൈഎഫ്ഐ നേതാവിന്റെ ബന്ധുവാണ് നികത്തലിന് കരാര് ഏറ്റെടുത്തിരിക്കുന്നത്. കഴിഞ്ഞ എല്ഡിഎഫ് സര്ക്കാര്തന്നെ കൊണ്ടുവന്ന തണ്ണീര്ത്തട നെല്വയല് സംരക്ഷണ നിയമം ലംഘിച്ചുകൊണ്ട് ചെയ്യുന്ന പ്രവൃത്തിക്കെതിരെ കടമക്കുടി വില്ലേജ് ഓഫീസര്, സ്ഥലം സബ് ഇന്സ്പെക്ടര് എന്നിവര്ക്ക് പരിസരവാസികള് പരാതിനല്കി.
പരാതിക്കാരെ ഗുണ്ടകള് ഭീഷണിപ്പെടുത്തുകയാണെന്ന് പരാതിയുണ്ട്. പോലീസ്, റവന്യൂ അധികാരികള് സിപിഎം നേതാക്കളുടെ സ്വാധീനത്തിന് വഴങ്ങി നടപടികള് സ്വീകരിക്കുന്നില്ല. പൊക്കാളിപ്പാടത്തിനൊപ്പം പാടത്തിനോട് ചേര്ന്നുള്ള 4 മീറ്റര് വീതിയുള്ള പുറമ്പോക്ക് തോടും ഇവര് മണ്ണിട്ട് നികത്തിക്കഴിഞ്ഞു.
കോതാട് കണ്ടെയ്നര് പാലത്തിനടിയില് ചെമ്മണ്ണ് വലിയ ലോറികളില് അടിച്ച്, അവിടെനിന്ന് മിനിലോറികളിലാണ് കോതാട് സെന്റ് ആന്റണീസ് ഷ്രൈനു വടക്കുഭാഗത്തുകൂടി പുതിയതായി ഉണ്ടാക്കിയ വഴിയിലൂടെ പൊക്കാളി പാടത്തിലേക്ക് മണ്ണ് എത്തിക്കുന്നത്. നിയമങ്ങളെല്ലാം കാറ്റില്പറത്തി നടത്തിക്കൊണ്ടിരിക്കുന്ന നികത്തലിനെതിരെ അധികാരികള് നടപടിയെടുക്കുന്നില്ല.
