ഇരിട്ടി: തിങ്കളാഴ്ച ഉച്ചയോടെ പെയ്ത കനത്ത മഴയില് പയഞ്ചേരി മുക്കില് വെള്ളം കയറി ഇരിട്ടി പേരാവൂര് റോഡില് ഗതാഗതം തടസ്സപ്പെട്ടു. ഒരു ചെറിയ ,ആഴ പെയ്താല് പോലും ഈ റോഡില് വെള്ളം, കയറുന്നത് നിത്യ സംഭവമായിരിക്കയാണ്. ഇരിട്ടി ബ്ലോക്ക് ഓഫീസ് മുറ്റത്തും ഇതോടൊപ്പം വെള്ളം കയറുന്നു. മുന്പ് വയലായിരുന്നതും പഴശ്ശി പദ്ധതിക്കായി എക്വയര് ചെയ്തതുമായ പ്രദേശം ഇരിട്ടി ബ്ലോക്ക് ഒഫീസിനായി പിന്നീട് വിട്ടു നല്കുകയായിരുന്നു. ഇവിടെ മണ്ണിട്ട് നിരത്തിയാണ് ബ്ലോക്ക് ഓഫീസും അനുബന്ധ കെട്ടിടങ്ങളും പണിതത്. കൂടാതെ ഇരിട്ടി മിനി സിവില് സ്റ്റേഷന് കണ്ടുവെച്ച സ്ഥലവും ഇതോടു ചേര്ന്ന ഭൂമിയാണ്. ഇരിട്ടി ഉപജില്ലാ വിദ്യാഭ്യാസ ഓഫീസും , ഇപ്പോള് നിര്മ്മാണ പ്രവര്ത്തനം ആരംഭിച്ച ഇലട്രിക്കല് സെക്ഷന് ഓഫീസ് കെട്ടിടവും , ഇരിട്ടി കെ എസ് ആര് ടി സി സബ് ഡിപ്പോ മുന്പ് ഉദ്ഘാടനം ചെയ്യപ്പെട്ടതും ഇപ്പോള് വീണ്ടും പ്രവര്ത്തനം തുടങ്ങാനുള്ള ശ്രമം നടക്കുന്നതും ഇതേ ഭൂമിയില് മണ്ണിട്ട് നിരപ്പാക്കിയ സ്ഥലത്ത് തന്നെ.
എന്നാല് റോഡിന്റെ മറുവശത്തും പണ്ട് വയലായിരുന്നു. ഇവയെല്ലാം മണ്ണിട്ട് നിരത്തി നിരവധികെട്ടിടങ്ങള് പണിയുകയും നിരവധി സ്ഥാപനങ്ങള് ഇന്ന് ഈ ഭൂമിയില് പ്രവര്ത്തിച്ചു വരികയും ചെയ്യുന്നു. പയഞ്ചേരി മുക്കിലെ കുന്നുകളില് നിന്നും കീഴൂര് തുടങ്ങിയ പ്രദേശങ്ങളില് നിന്നും മറ്റും ഒഴുകി വരുന്ന വെള്ളം കടന്നു പോകുവാന് വളരെ ചെറിയ ഒരു ഓവുചാല് മാത്രമേ ഇവിടെ ഉള്ളൂ. ഈ ഓവുകള്ക്ക് താങ്ങുവാന് കഴിയാത്തതിലും വലിയ ജലപ്രവാഹമാണ് മഴപെയ്യുമ്പോള് ഇവിടെ ഉണ്ടാവുന്നത്. വയലുകളും പ്രകൃതിയും നശിപ്പിച്ചതിന്റെ ദുരിതമാണ് ഇന്ന് ഈ പ്രദേശത്തുകാര് ഇപ്പോള് അനുഭവിക്കുന്നത്. റോഡ് ഉയര്ത്തുകയും വെള്ളം പെട്ടെന്ന് ഒഴിഞ്ഞുപോവാന് തക്കവണ്ണമുള്ള വീതിയേറിയ ഓവുചാല് സംവിധാനം ഉണ്ടാക്കുകയുമാണ് ഇതിനു ശാശ്വത പരിഹാരം എന്ന് വിലയിരുത്തപ്പെടുന്നു.
