ഇരിട്ടി: ഇരിട്ടി മേഖലയില് കനത്ത മഴ തുടരവേ ഇരിട്ടിക്കുന്ന് ഇടിഞ്ഞു താഴുന്നത് ഇതുവഴി കടന്നുപോകുന്ന വാഹനയാത്രക്കാരിലും കാല്നടയാത്രക്കാരിലും ആശങ്ക സൃഷ്ടിക്കുന്നു. കഴിഞ്ഞ ദിവസത്തെ മഴയിലാണ് ഇരിട്ടി പലത്തിന്നു സമീപം ഫോറസ്റ്റ് ചെക്ക് പോസ്റ്റിന് മുന്വശത്തെ കുന്ന് കൂറ്റന് കല്ലുകളടക്കം ഇടിഞ്ഞുവീണത്. ഏതാനും മാസം മുന്പ് കുന്നിന്റെ മുകളിലേക്ക് പോകുന്ന റോഡ് ഉയരം കുറക്കുന്നതിനും വീതികൂട്ടുന്നതിനുമായി കുന്നിന്റെ ഒരുഭാഗം ഇടിച്ചിരുന്നു. ഇതിന്റെ മറവില് കുന്നിന്റെ തന്നെ ഒരുഭാഗം ഇടിച്ചു നിരത്താനുള്ള ശ്രമവും നടന്നിരുന്നു. ഈ ഭാഗത്ത് നിന്നാണ് ഇപ്പോള് കല്ലും മണ്ണും ഇടിഞ്ഞു റോഡിലേക്ക് വീണിരിക്കുന്നത്. മണ്ണിടിഞ്ഞ സ്ഥലത്ത് നിന്നും കഴിഞ്ഞ ദിവസത്തെ കനത്ത മഴയില് മണ്ണും ചെളിയും ഒഴുകി റോഡിലേക്ക് എത്തിയതുകാരണം കാല്നട യാത്രപോലും ദുസ്സഹമായിരുന്നു.
ഇരിട്ടി-കുടക് അന്തര്ദേശീയ പാത കടന്നുപോകുന്നത് ഈ കുന്നിനോട് ചേര്ന്നാണ്. കുന്നിനും പുഴയ്ക്കും ഇടയിലൂടെ കടന്നുപോകുന്ന ഈ പാതയിലൂടെ രാത്രിയെന്നോ പകലെന്നോ വ്യത്യാസമില്ലാതെ വലുതും ചെറുതുമായ നൂറുകണക്കിന് വാഹനങ്ങളാണ് നിത്യവും കടന്നു പോകുന്നത്. കുന്നിന്ചെരുവില് വന് പാറക്കല്ലുകള്ക്കിടയില് വളര്ന്നുനില്ക്കുന്ന മരങ്ങളും അപകട ഭീഷണി ഉയര്ത്തുന്നുണ്ട്. മഴ തുടര്ന്നാല് ഏതു നേരവും മരങ്ങള് മറിഞ്ഞുവീഴുകയും കുന്നിടിഞ്ഞു വീഴുകയും ചെയ്യുമെന്ന ആശങ്കയിലാണ് ജനങ്ങള്. ഈ കുന്നിന്റെ ഒരു ഭാഗത്തോട് ചേര്ന്നാണ് ഇരിട്ടി പൊതുമരാമത്ത് വകുപ്പ് ഓഫീസ് സ്ഥിതി ചെയ്യുന്നത് എന്നതും മറ്റൊരു വസ്തുതയാണ്.
