ഭാരതീയ നാടകവേദിക്ക് കേരളം നല്കിയ സംഭാവനയാണ് കാവാലം നാരായണപ്പണിക്കര്. തനിമയുള്ള കേരളീയശൈലിയില് അദ്ദേഹം രചിച്ച നാടകങ്ങളും അതിന്റെ രംഗാവിഷ്കാരവും ഗാനങ്ങളും കേരളീയ കലാസ്വാദകര്ക്ക് ഒരു പുത്തനുണര്വ് നല്കിയിട്ടുണ്ട്.
കുട്ടനാടിന്റെ തനതു കാര്ഷിക സംസ്കാരം കൈവിടാതെ, ഒരുകാലത്തെ കലാപ്രതിഭകളെ കേന്ദ്രീകരിക്കാന് കാവാലത്തിന് കഴിഞ്ഞിരുന്നു. സി.എന്. ശ്രീകണ്ഠന് നായരുടെ നാടകത്രയവും അരവിന്ദന്റെ കാഞ്ചനസീതയും കേരളീയ മനസ്സില് വ്യത്യസ്തമായ ആസ്വാദനശേഷി സൃഷ്ടിച്ചപ്പോള് തിരുവനന്തപുരത്ത് സോപാനമെന്ന സങ്കേതം കേരളത്തിന്റെ പൗരാണികകലകളായ തെയ്യവും തിറയും കൂടിയാട്ടവും കഥകളിയുമെല്ലാം നല്കുന്ന പ്രചോദനത്തെ ആവിഷ്കരിച്ചെടുത്തുകൊണ്ട് ഒരു തനതു നാടകവേദി സൃഷ്ടിക്കാന് കാവാലത്തിന് കഴിഞ്ഞു.
ആസ്വാദക സമൂഹത്തിലേക്കിറങ്ങിവരുന്ന കരിങ്കുട്ടിയും അവനവന് കടമ്പയും മറ്റും തങ്ങള് കണ്ടുമറന്ന ഏതോ ഒരു പഴയ കലാരൂപമാണ് മുന്നില് കാണുന്നതെന്ന അനുഭവമാണ് ആസ്വാദകരില് സൃഷ്ടിച്ചിരുന്നത്. അത്തരം പുതിയ കലാരൂപങ്ങള് ജനഹൃദയങ്ങളിലേക്കിറങ്ങിയപ്പോള് അദ്ദേഹത്തിന് ലഭിച്ച ആത്മവിശ്വാസത്തില് നിന്നും ഭാസന്റെയും കാളിദാസന്റെയും സംസ്കൃത നാടകങ്ങളിലേക്കും ശ്രദ്ധ പതിഞ്ഞു.
ഭഗവദജ്ജുകവും മധ്യമവ്യായോഗവും മറ്റും തനി സംസ്കൃതത്തിലവതരിപ്പിച്ചപ്പോഴും ആസ്വാദകര് ആനന്ദിക്കുക മാത്രമല്ല, അനുകരിക്കുകയും ചെയ്തിരുന്നു. ഏറ്റവുമൊടുവില് കാളിദാസന്റെ നാടകത്രയത്തിലെ പ്രധാന കഥാപാത്രങ്ങളെ രംഗത്തവതരിപ്പിച്ചുകൊണ്ടുള്ള ‘സഗമനിയം’ ഭോപ്പാലില് അവതരിപ്പിച്ചപ്പോള് അത് ഒരു വ്യത്യസ്ത പരീക്ഷണമായിരുന്നു.
സംഗീതനാടക അക്കാദമിയുടെ അധ്യക്ഷനായിരുന്നുകൊണ്ട് നാടകവേദിയെ ധന്യമാക്കുകയും ഒട്ടനവധി അവാര്ഡുകള്ക്ക് അര്ഹനാവുകയും ചെയ്തു.
കുട്ടനാട്ടിലെ പ്രസിദ്ധമായ ചാലയില് കുടുംബത്തില് ജനിച്ച നാരായണപ്പണിക്കര് നെടുമുടി വേണുവിന്റെയും ഭരത് ഗോപിയുടെയും സഹകരണത്തോടെ തിരുവനന്തപുരത്തെ സോപാനം നാടകവേദിയിലൂടെ അവതരിപ്പിച്ച നാടകങ്ങളില് പലതും പൊതുവേദിയിലവതരിപ്പിക്കാന് തപസ്യക്ക് അവസരം ലഭിച്ചുവെന്നത് ചാരിതാര്ത്ഥ്യജനകമാണ്.
പല നാടകങ്ങളും കാവാലത്തിന്റെ സാന്നിധ്യത്തില് ആദ്യമായി അവതരിപ്പിക്കാന് തപസ്യക്ക് കഴിഞ്ഞിട്ടുണ്ട്. കരിംകുട്ടിയെന്ന നാടകം കേരളത്തിലുടനീളം തപസ്യയുടെ വേദികളില് അവതരിപ്പിച്ചിട്ടുണ്ട്. സദസ്യരുടെ ഇടയില്ക്കൂടി കഥാപാത്രങ്ങള് കടന്നുവരുമ്പോള് ഉണ്ടാകുന്ന പ്രതികരണങ്ങള് ഒന്നുവേറെയാണ്. തിരുവനന്തപുരത്ത് സംഘടിപ്പിച്ച ബാലഗോകുലത്തിന്റെ നാടകപരിശീലന കളരിയിലും അദ്ദേഹം പങ്കെടുത്തിരുന്നു.
ഏറ്റവുമൊടുവില് തപസ്യയുടെ കോട്ടയം വാര്ഷികസമ്മേളനം ഉദ്ഘാടനം ചെയ്തുകൊണ്ട് ചെയ്ത പ്രസംഗം തപസ്യയോടുള്ള തന്റെ അനിതരസാധാരണമായ താല്പര്യം വ്യക്തമാക്കുന്നതായിരുന്നു.
