ബീജിങ്: 2026ല് ചൈനയെ ബാധിച്ച ഏറ്റവും ശക്തമായ ചുഴലിക്കാറ്റായ ‘നൗള്’ ഇന്നലെ പുലര്ച്ചെ തെക്കന് ചൈനയിലെ ഗുവാങ്ഡോങ് പ്രവിശ്യയില് കരതൊട്ടു. മണിക്കൂറില് 110 കിലോമീറ്ററിലധികം വേഗത്തില് വീശിയ കാറ്റും അതിശക്തമായ മഴയും വ്യാപക നാശനഷ്ട ഭീഷണി ഉയര്ത്തിയതോടെ ചൈന ഭരണകൂടം വന്തോതില് ദുരന്തനിവാരണ നടപടികള് ആരംഭിച്ചു.
പ്രളയഭീഷണി കണക്കിലെടുത്ത് എട്ട് ലക്ഷത്തിലധികം ആളുകളെ സുരക്ഷിത കേന്ദ്രങ്ങളിലേക്ക് മാറ്റി. ഗുവാങ്ഡോങ് ഉള്പ്പെടെ നിരവധി പ്രവിശ്യകളില് വെള്ളപ്പൊക്കത്തിനുള്ള ഏറ്റവും ഉയര്ന്ന മുന്നറിയിപ്പ് പ്രഖ്യാപിച്ചു.
ഹോങ്കോങ്ങിലും ചുഴലിക്കാറ്റിന്റെ ശക്തമായ ആഘാതമുണ്ടായി. 350ലധികം വിമാനങ്ങള് റദ്ദാക്കി, നിരവധി ട്രെയിന് സര്വീസുകളും ഫെറി സര്വീസുകളും നിര്ത്തിവച്ചു. നഗരത്തില് നിരവധി മരങ്ങള് കടപുഴകി വീഴുകയും കെട്ടിടങ്ങള്ക്ക് കേടുപാടുകള് സംഭവിക്കുകയും ചെയ്തു. നിരവധി പേര്ക്ക് പരിക്കേറ്റതായി അധികൃതര് അറിയിച്ചു.
ഗുവാങ്ഡോങില് നിന്ന് ഉള്നാടന് മേഖലകളായ ഫുജിയാന്, ജിയാങ്സി, ഹുനാന് എന്നിവിടങ്ങളിലേക്കാണ് ചുഴലിക്കാറ്റ് നീങ്ങുന്നത്. അടുത്ത രണ്ട് ദിവസവും അതിശക്തമായ മഴ തുടരാന് സാധ്യതയുണ്ടെന്ന് ചൈനയുടെ ദേശീയ കാലാവസ്ഥാ കേന്ദ്രം മുന്നറിയിപ്പ് നല്കി. മലമ്പ്രദേശങ്ങളിലും നദീതീരങ്ങളിലും മണ്ണിടിച്ചിലും പെട്ടെന്നുള്ള വെള്ളപ്പൊക്കവും ഉണ്ടാകാമെന്ന് അധികൃതര് അറിയിച്ചു.
